Darréu el manifestamientu tendrá llugar un actu amenizáu por Nacho Vega, el Coru L’Altu la lleva y Leticia, de L-R Folk
CNT ya’l Grupu d’Apoyu a les 6 de La Suiza convocaron ayeri una rueda de prensa pa pidir la participación de la ciudadanía nel manifestamientu de sofitu que percorrerá les cais de Xixón esti sábadu 15 de magar les 12 del mediudíi.
El martes 18 de Xunu la Sala de lo Penal del Tribunal Supremu revisará’l casu de les 6 de La Suiza, media docena de sindicalistes condergaes a un total de 21 años de prisión polos supuestos delitos de “Obstrucción a la xusticia y Coacciones graves”. El xuez Marchena preside la vista, que tien llugar de magar el recursu presentáu poles afeutaes al entender que se trata d’una sentencia inxusta na que se yos conderga por facer sindicalismu defendiendo a una muyer en situación de vulnerabilidá.
Con ello, non solo se conderga l’aición sindical sinón que se desanima a les muyeres en situaciones asemeyaes, que tornen a la tradicional situación de ser castigaes por defendese, col sistema siempres a favor del poderosu y del patriarcáu.
A la rueda de prensa acudieron, pente otres, la representante d’UXT que reconoció la necesidá de que tolos sindicatos y ciudadanos se impliquen nesti casu ya que “miremos pa otru llau endemasiau tiempu y esto nun ye cuestión de sigles porque mos afecta a toos”.
Llucía F. Marqués
This work is licensed under a Creative Commons Attribution 4.0 International License.
