Inasequible al desánimu, inmune a les cifres, ignorando olímpicamente consecuencies, desoyendo -pa nun variar- la voz del pueblu, el presidente del Principado, Adrián Barbón, aporfia en destacar “la importancia de potenciar el turismu rural”

Llucía F. Marqués

Nel alcuentru “El turismo para el desarrollo económicu y social” cellebráu en Madrí -meca espiritual y política de cualisquier politiquín que se precie- Adrián Barbón aporfió en qu’Asturies ye “una referencia turística diferente”, atreviéndose a afirmar que “somos la costa meyor conservada d’España y, posiblemente, d’Europa”, pasando olímpicamente per alto los problemes, pente otros, de xestión de residuos humanos, que tolos branos agrava’l turismu, y que finen invariablemente con arramaos de, lliteralmente, mierda, nes sableres asturianes.

Afala nesa llinia la “oportunidá” del turismu rural pa torgar el despoblamientu. Porque toos sabemos qu’un pueblu al que van los turistes unos meses al añu nun ta deshabitau, y que la proliferación de viviendes pal turismu nun dispara los precios de la vivienda nin complica la posibilidá de fixar población continuo nos pueblos. Que yos entruguen a los canarios.

Y ya puestu, culpa a los trabayadores de la crisis de personal del sector turísticu. P’Adrián nun ye que seya un sector precarizáu nel que naide quier trabayar pola falta estabilidá, les males pagues, los horarios etenros, los impagos, la estacionalidá y la esplotación; ye que nun tamos estudiaos -pa facer de camareros, entiéndese, porque xente con carrera al paru hai a pataes-.

Porque… ¿Cómu diba ser la precariedá del sector el problema? ¡Si el turismu ye la panacea!.