El Ministeriu Fiscal da un pasu alantre na proteición de la fauna denunciando los avezaos casos d’envelenamientu en dellos conceyos asturianos

Nos caberos años rexistróse l’apaición d’animales envelenaos n’estremaos puntos de los conceyos de Teberga, Quirós, Proaza, Yernes y Tameza y Mieres, especialmente utres y perros. Diches muertes paecen tar rellacionaes con dellos episodios d’envelenamientu ya que nos conceyos mentaos apaecen, de manera recurrente y dende va décades, aves y otros animales selvaxes envelenaos ensin que naide fuera condergáu por esti delitu. Esta práctica delictiva afecta a especies protexíes como l’osu pardu cantábricu, llobu o la águila real y tien efectos negativos bien graves nel restu de la cadena trófica.

Nos años 60 y 70 del sieglu pasáu l’usu de cebos envelenaos foi una práctica avezada ente ganaderos y cazadores, qu’adulces foi decayendo debíu al nuevu ordenamientu xurídicu y gracies a los llabores de divulgación sobro les perverses consecuencies del usu de velenos na naturaleza. Sicasí, nos últimos años detectóse un grave y bien esmolecedor repique nel so usu, reculando a los alarmantes niveles de va décades, cuando yera una práctica permitida.

L’usu de velenos implica la eliminación indiscriminada de la fauna polo xeneral, yá que ye d’un métodu non selectivu qu’afecta a delles especies depredadores, a carroñeres, a especies omnívores ya inclusive a animales domésticos, pudiendo entrar a formar parte de la cadena alimenticia humana. Amás, ye una práctica cruel, que conduz a una muerte lenta y doliosa por aforfugamientu y paralís muscular del animal. 

Esti métodu illegal de control non selectivu causa la regresión (cuando non la estinción) de la fauna, col agravante de que les principales especies afectaes son munches vegaes especies con un estáu de caltenimientu bien comprometíu. El problema ye entá más grave de lo que pueda paecer si tenemos en cuenta que namás se detecta un pequenu porcentaxe de los animales envelenaos.

La Coordinadora Ecoloxista considera que l’alministración del Principáu d’Asturies nun pon l’enfotu necesariu n’escorrer un delitu tan grave como ye l’usu de velenos pa matar a los animales que resulten cafiantes. Dende 1995 esta práctica ta tipificada como delitu nel Art. 336 del Códigu Penal español, acarretando penes d’ente seis meses y dos años de cárcel. Sicasí n’Asturies, a pesar de les decenes d’episodios d’envelenamientu que se conocen nos últimos años, fueron bien pocos casos los que se pudieron llevar ante los tribunales.

Recientemente y magar les denuncies interpuestes pola CEA, el Ministeriu Fiscal formula vien de presentar denuncia énte’l Xulgáu d’Instrucción de Guardia d’Uviéu por presuntos delitos contra la proteición de la fauna, previstos y penaos nos artículos 334 y 336 del Códigu Penal y contra los animales, previstu nel artículu 340 bis del Códigu Penal.

.