El serviciu tará en furrulamientu tola temporada braniega, dende ayeri y fasta’l 30 de setiembre
Asturies cuenta con delles sableres con serviciu especial pa persones con dificultaes motrices, con ramples d’entrada, pasareles y silles de ruedes anfibies, adautaes al sable asina comu con disponibilidá de personal polivalente preparáu pa dar un apoyu personal integral a les persones que necesiten un sofitu pa esfrutar plenamente de la playa, incluyendo los baños na mar ya l’usu del equipamientu disponible pa ello.
Carreño ye’l conceyu que cuenta con más sableres atendies por personal d’ayuda al bañu, que ta disponible nes sableres de Xivares, Candás, Carranques, Huelgues y la Palmera; amás cuenten con esti serviciu les sableres de Poniente, en Xixón, la de La Griega en Colunga, la de San Pedro de la Bocamar, en Cuideiru, Toró en Llanes y la de Ribeseya. La de Barro, en Llanes y la d’Aguilar en Muros del Nalón nun tien personal pero si silles anfibies disponibles.
La mayoría disponen d’aparcamientos reservaos, ramples y pasareles especiales pa silles de ruedes, llugares con solombra y cabines adaptaes.
Pa que toos y toes puedan esfrutar al másimu del branu… si ye que llega.
Alberto Rodríguez
This work is licensed under a Creative Commons Attribution 4.0 International License.
