“Les midíes llexislatives que s’aprueben tienen de restituyir los derechos de les víctimes del abusu de temporalidá nes mesmes condiciones, drechos y obligaciones que les del restu de personal fixo o funcionariu”.

Les sentencies del TXUE  del 22 de febreru y 13 de xunu del 2024 almiten que la estabilidá ye una midida afayadiza pa sancionar a les alministraciones y desquitar al personal temporal víctima d’abusu na so contratación.
Los servicios xurídicos de les diverses organizaciones sindicales territoriales que formen parte de la
Confederación Intersindical tán analizando y valorando les posibles implicaciones de la última sentencia del TXUE, del 13 de xunu del 2024.
Anque nun se puede alantrar qué midíes concretes se van tomar hasta que’l Tribunal Supremu se
pronuncie, sí que resalten delles considerances del TXUE que sofiten los principios y llinies d’acción sindical que siempre se defendió dende los sindicatos d’ensiñantes, ya que seique nun avala que’l personal interín n’abusu de temporalidá pase a ser directamente funcionariu de carrera, sí contempla que los tribunales de xusticia pueden establecer como sanción convertir la so relación de trabayu n’indefinida.
SUATEA entiende qu'”un gobiernu que se diz progresista tendría de ser el que dea una solución llexislativa al abusu de la temporalidá que restituya dafechu y ensin escepciones los drechos del personal que tuvo contratáu al so serviciu décades” polo que planteguen la necesidá de llexislar de manera que se xeneren figures nel drechu internu que permitan estabilizar persones y non places o puestos vacantes. D’esta manera, insisten, evitaríase tener que xudicializar el procedimientu.
“La estabilidá llaboral ye’l puntal de los derechos llaborales y el principiu irrenunciable de la nuestra actividá sindical. Vamos Lluchar por estos principios al llau de les fuerces sindicales y plataformes que tean dispuestes” anuncien dende’l Sindicatu Asturianu d’Ensiñantes.

Susana Sela

This work is licensed under a Creative Commons Attribution 4.0 International License.