La Coordinadora Ecoloxista destaca los desaxeraos valores rexistraos na contorna del Nalón d’un peligrosu contaminante como ye l’azufre.
Acordies los datos oficiales del Gobiernu d’Asturies, recoyíos na so web sobro contaminación atmosférica y calidá del aire (d’alcuerdu a la obligación establecida na Directiva 2008/50/CE y el RD 102/2011), la estación de control de calidá del aire de Blimea, en Samartín del Rei Aurelio, rexistró un picu de 490 µg/m3 de S02, lo que se considera como un valor bien desfavorable d’alcuerdu al Índiz Nacional de calidá del Aire. Como ye vezu énte esti tipu d’episodios contaminantes, la población de la zona nun foi alvertida d’esti riesgu pal so salú nin pol Gobiernu d’Asturíes nin pol Conceyu.
La Organización Mundial de la Salú encamienta nun superar una media de 40 µg/m3 de SO2 en 24 hores seique la tolerante normativa española dexa algamar los 125 µg/m3 de de media diaria. El diósidu d’azufre (SO2) venceyóse a problemes d’asma y bronquitis crónica, amontando la morbilidá y mortalidá en persones mayores y reciella y disparando los indicadores de cáncanos n’esposiciones prollongaes. Los asmáticos y les persones con enfermedaes polmonares obstructives cróniques (EPOC) y con problemes cardiacos son los más sensibles a los efeutos del SO2. L’azufre ye un velenu altamente nocivu pa la salú de les persones y los animales.
Ta complerbao que los picos de contaminación atmosférica disparen los ingresos hospitalarios n’Asturies por enfermedaes respiratories, acordies a un estudiu epidemiolóxicu realizáu pola mesma conseyería de Sanidá del Principado.
La evidencia científica nun suxere dala llende perbaxo la que nun se prevean efectos adversos a la salú tres la esposición a la contaminación, mesmo perbaxo de los niveles de calidá d’aire consideraos como seguros pola llexisllación ambiental, polo que la OMS encamienta amenorgar tolo posible la esposición a la contaminación atmosférica, encamientu que n’Asturies ye cenciellamente imposible.
Alberto Rodríguez
This work is licensed under a Creative Commons Attribution 4.0 International License.
