L’alcuentru, entamáu pol Institutu d’Inxenieros Eléctricos y Electrónicos (IEEE), va cellebrase del 8 al 11 de xunetu.
Amás, IEEE va collaborar con Mar de Borrina p’averar a la sociedá los conceutos básicos y les aplicaciones de la nanociencia y la nanotecnología na nuesa vida.
Trátase d’una xunta d’ámbitu internacional que va traer a Xixón del 8 al 11 de xunetu a más de 400 investigadores de too el mundu. La relevancia d’esti congresu ta nel so conteníu, venceyáu cola investigación tecnolóxica y la Ca Conceyu confía en que traiga “sinerxies, contautos y deprendizaxe pa les empreses de base tecnolóxica que tenemos en Xixón, col nuesu Parque Científicu y Tecnolóxicu como principal exa y motor d’esti sector”.
El congresu ta promovíu pola IEEE, asociación internacional, con 140 años d’hestoria qu’acueye a los profesionales de la inxeniería, tecnoloxía y ciencia de tol mundu con más de 460,000 miembros en 190 países y más de 171.000 estudiantes miembros. La IEEE integra a 39 sociedaes técniques qu’en 10 rexones xeográfiques convoquen ca añu más de 10.000 xuntes de distintos ámbitos.
Rocío Álvarez, directora de Mar de Borrina, presentó tamién un proyectu de llegáu conxuntu con IEEE col que pretende averar a la sociedá, y n’especial a neños, neñes y adolescentes con menos oportunidaes, los conceutos básicos y les aplicaciones de la nanociencia y la nanotecnoloxía na nuesa vida.
Susana Sela
This work is licensed under a Creative Commons Attribution 4.0 International License.
