Al actu de donación, qu’incluyó tamién dellos llibros y dalgunos exemplares de la revista Xixón 100%, acudieron abondes autoridaes y representantes del mundiu sidreru
La Hemeroteca de Xixón recibió ayeri la donación de la coleición completa de la revista LA SIDRA, una espublización cientrada na nuesa bébora nacional que recueye la información sidrera, mes a mes, de los caberos venti años, siendo un casu únicu de continuidá y la única espublización mundial que recueye con periodicidá l’actualidá de la sidre.
Na so intervención Marcos Abel Fernández, presidente de Espublizastur, recordó el nacimientu de la revista de la man d’un grupu d’amigos apasionaos pola sidre va 20 años, teniendo pallabres d’agradecimientu a los llagareros que sofitaron el proyeutu, a la DOP y a los chigres, “ensin quienes non solo la revista, sinón la cultura sidrera mesma nun sedría posible”.
“¿Qué esperébemos con esta donación? La inmortalidá” declaró el presidente, que resaltó la emportancia de cuntar con una hemeroteca comu la de Xixón pa caltener el padremuñu asturianu, falando de la importancia de que d’agora y pal futuru la hestoria de los venti caberos años del mundiu de la sidre te disponible pa tolos asturianos nos fondos d’esta hemeroteca.
Darréu faló Guzmán Pendás, conceyal de participación Ciudadana, Mercaos y Consumu, quien agradeció el llabor de LA SIDRA nel caltenimientu de la cultura sidrera, asina como la donación d’exemplares. La sidre, declaró “Ye parte del nuesu ADN y un símbolu d’identidá de los asturianos”.
Intervino tamién la Directora Xeneral d’Agricultura, Agroindustria y Desendolcu Rural Begoña López, agradeciendo y reconociendo l’importante llabor de la revista “A vegaes un nun se da cuenta de que al entamar un proyectu como esti, ta construyendo Asturies” destacó.
Pa finar tolos presentes compartieron unes botelles de sidre DOP nun brindis coleutivu acompangáu d’un pincheu a cargu de la Escuela d’Hostelería de Xixón.
Nel Dos Santos
This work is licensed under a Creative Commons Attribution 4.0 International License.
