Depués de tola selmana repartiendo información a los visitantes de la Semana Negra, na tardi de güei cientos de persones percorrieron la popular feria reclamando llibertá pa les sindicalistes
Pente les miles de persones qu’atarraquitaben la Semana Negra, munches conocíen el conflictu de les 6 de La Suiza y foron incorporándose na riada naranxa que reclamaba la so llibertá. Otres munches desconocíen el casu y aparaben a recoyer los folletos con información o a escuchar les desplicaciones a viva voz que, micrófonu en man, diben repitiendo delantre de les terraces y puestos. D’ente estos caberos yera patente la incredulidá ante l’ensin xacíu de la sentencia que conderga a prisión a seis persones por defender a una muyer de los abusos del so xefe. Asina, percorriendo la Semana Negra el manifestamientu foi medrando, fasta que la voz que desixía la llibertá pa les seis y yos prometía que nun tarien soles sonó con más fuercia que la música de la noria, les tómboles y los altavoces que formaben l’orixinal escenariu d’esta concentración.
Entantu, na entrada mesma de la feria una mesa informativa recoyía robles escontra l’encarcelamientu y vendía camisetes y otru material col envís de recaldar fondos colos que facer frente a los gastos del procesu xudicial.
Nel Dos Santos
This work is licensed under a Creative Commons Attribution 4.0 International License.
