Ayeri abrióse al públicu na Casa de Cultura de Cangues d’Onís la esposición de les semeyes ganadores del XV Concursu de Semeyes LA SIDRA ya’l vienres entamen tres díes de folixa sidrera nel Parque Riera
Hasta’l próximu 31 d’agostu podrá visitase la esposición, qu’abelluga un total de 20 semeyes, ente les que s’atopa la ganadora del concursu, los dos áccesits y la ganadora del Premiu JR, acompañaes d’otres 16 semeyes que tamién resultaron finalistes.
La cita sidrera de la Primer Sidre de Cangues, que se va celebrar na que foi la primer capital de Asturies los díes 19, 20 y 21 de xunetu, va tener un formatu asemeyau al de la Primer Sidre l’Añu, que lleva 14 ediciones cellebrándose en Xixón. La entrada, de diez euros, permitirá participar de tolos talleres, tasties guiaes, degustaciones y actividaes, tanto pa reciella -qu’entra de baldre- comu p’adultos, amás de poder bebese tola sidre que se quiera de los más de diez llagares participantes, siendo Sidra Riestra la oficial d’esta primer edición. La música tampocu faltará, cola Banda Gaites el Gumial y actuaciones de grupos de música tradicional. Una perbona ocasión, recalcó Fernández, pa que los sidreros esfruten y los qu’entá nun lo son conozan de primer man la cultura asturiana de la sidre.
Na presentación Llucía Fernández, de la Fundación Asturies XXI, resaltó’l compromisu de Cangues cola sidra y la so cultura, un compromisu que s’espeya na incorporación de Cangues a la Rede Europea de Ciudaes de la Sidra –Cider Cities-, organización impulsada por Asturies XXI y que’aconceya a ciudaes de cinco estaos d’identidá estrechamente venceyada a la sidre, y na so participación nel proyectu CIDEREU na Xunión Europea, con una planificación alredor de la cultura de la mazana y la sidre que va desendolcase a lo llargo de 2025-2026.
Alberto Rodríguez
This work is licensed under a Creative Commons Attribution 4.0 International License.
