El casu de los cinco activistes acusaos por cortar la carretera en defensa’l mediu ambiente ye un pasu más nel procesu de criminalización de cualquier protesta ciudadana, yá seya llaboral, social o ecoloxista
Esti próximu xueves 25 de xunetu a les 9:00 nel Palaciu de Xusticia de Xixón entamen les declaraciones de cinco persones de XR Rebelión o Estinción Asturies acusaes de cargos penales pola acción de protesta realizada’l pasáu 18 de mayu a la entrada d’Arcelor.
Por cuenta de esti procesu xudicial, dellos coleutivos ambientales y sociales convoquen esi día y hora a acompangar y sofitar a les persones acusaes.
El grupu Rebelión o Estinción (XR) Asturies encadenóse la mañana del 18 de mayu na vía d’accesu al complexu industrial de Veriña (Xixón), realizando un bloquéu humanu que torgaba la entrada y salida de camiones a la fábrica d’aceru Arcelor-Mittal. La demanda tres de l’acción directa non violenta yera’l cese de sovenciones per parte’l Gobiernu a empreses de combustibles fósiles, formando parte de la campaña europea de fin a los sosidios a los combustibles fósiles de la coalición Xuníes pola Xusticia Climática.
El grupu activista XR Asturies bloquió mientres casi dos hores el pasu de camiones a la planta d’Arcelor-Mittal por aciu l’encadenamientu de cinco persones d’un llau al otru de la carretera, hasta la llegada d’una unidá d’intervención policial, qu’identificó a los manifestantes y procedió a la corte de les cadenes, ensin realizar detenciones. L’acción tuvo acompangada de bengales y activistes con pancartes con mensaxes como: «menos ayudes al capital, más xusticia social», «Stop Subsidios Fósiles», «Arcelor-Mortal» y «Financiando la estinción».
Esta acción formaba parte de la campaña empecipiada por Xuníes pola Xusticia Climática, una coalición de movimientos pola xusticia climática ente los que s’atopa XR, Greenpeace y Fridays for Future y que coordinaron un conxuntu de protestes a nivel européu, na que s’esixe’l fin de los subsidios a empreses de combustibles fósiles. Nenguna otra de les protestes realizaes en toa Europa tuvo repercusiones penales.
Hai que remembrar qu’Asturies asitiase en primer posición como territoriu que xenera más emisiones contaminantes y d’efectu invernaderu de tola Unión Europea (UE). Esto pué entendese por cuenta de la fuerte presencia del sector industrial nel territoriu, ente los que destaca Arcelor-Mittal. Esta empresa, dedicada a la producción d’aceru, emitió un total de 5.097.167 tonelaes de de CO2-eq nel añu 2020 y ye la empresa que más sosidios a los combustibles fósiles recibe per parte’l Gobiernu Español, con un total de 26,7 millones d’€ nel añu 2023, ensin qu’ello repercutiere enxamás nuna meyora nes condiciones llaborales de los sos trabayadores nin nos niveles de contaminación de la ciudá.
XR Asturies ye un grupu d’acción pola xusticia climática que forma parte del movimientu internacional Extinction Rebellion, que s’empecipió l’añu 2018 en Llondres arriendes de la esmolición de la población pola crisis climática y la falta de tresparencia y acción per parte de los gobiernos. XR utiliza la desobediencia civil y l’Acción Directa Non Violenta (ADNV) como ferramientes pa denunciar la falta d’acción gubernamental énte la situación d’emerxencia climática.
Nel Dos Santos
This work is licensed under a Creative Commons Attribution 4.0 International License.
