L’alternativa pa les comisiones de festexos, afogaes pol canon de la SGAE, ta na música tradicional, nes llistes Creative Commons o na contratación de músicos con repertoriu propiu
Pertenecer a una comisión de festexos consiste, básicamente, en trabayar asgaya pa, nel meyor de los casos, nun perder perres. Tratase d’un llabor desinteresáu qu’ayuda a caltener la xunión de la comunidá, yá seya d’un barriu, un pueblu o una parroquia. Nos caberos tiempos, estes asociaciones tán viéndose afogaes por dellos gastos ayenos a les actividaes que lleven a cabu, especialmente’l canon que la SGAE desixe pol espardimientu de conteníos artísticos, que los organizadores consideren abusivu dafechu y que ta condergando a muerte a munchos d’estos coleutivos.
Cuidao que nun hai beneficiu económicu y si espardimientu cultural, podría paecer que’l cobru de drechos equí ta inxustificáu. Nun lo considera asina la SGAE nin la llexislatura española a la que tamos sometíos.
Poro, a los numberosos gastos lloxísticos que trai una fiesta popular hai qu’añedir ún un tantu virtual: la tasa pol usu del repertoriu de la SGAE; lo que plantega direutamente una entruga de mala respuesta: ¿cuál ye esautamente’l repertoriu SGAE?.
Ellos mesmos reconocen como pocu fiable la so propia base de datos y foi en delles ocasiones denunciáu’l cobru de drechos d’autor por obres llibres de derechos… ye frecuente’l cobru por obres d’autores finaos hai más de 75 años (llende qu’axusta la llei pa que’l drechu pueda ser executáu) o por obres con llicencia Creative Common. Llegaron a suxerir que les comisiones de festexos tendríen de pidi-yos permisu a ellos pa cellebrar les sos fiestes, trámite que ye competencia de los conceyos.
N’ Asturies son yá numberoses les folixes que se cellebraron por cabera vegada, ante la incapacidá de facer frente a les deldes –d’hasta 12.000 €- que caltienen cola SGAE, colo que se ta poniendo en pelligru una de les señes identitaries de los nuesos branos: les fiestes de prau. Los más perxudicaos, como non, los pueblos pequeños, colo qu’esta presión ye una más énte los problemes a los que s’enfrenta’l mundu rural asturianu.
¿Hai dalguna opción pa esquivar a la SGAE?
Si. Ellos prefieren que nun seya daqué demasiao conocío, pero arriendes de la música del repertoriu tradicional asturianu –que ta llibre de drechos y ye, por tanto, una opción más qu’interesante p’animar fiestes de prau- , esisten decenes de miles d’artistes que decidieron llibrase del Copyright. En plataformes como http://www.jamendo.com puede atopase un repertoriu llicenciáu en Creative Common, xestionáu de forma bien distinta, a precios más competitivos o inclusive de baldre y reconocíu xurídicamente.
Quién nun sintió dalguna vegada falar de la SGAE?
La entidá de xestión de drechos d’autor por antonomasia, SGAE, xestora de los drechos de miles de creadores, ye más conocía nel nuesu país –y fora d’él- polos sos abusos y escesos que pol cumplimientu’l so deber.
La voracidá recaldatoria d’estos supuestos defensores de la cultura llévalos a desixir drechos por cuestiones de lo más variopintes: los asturianos paguemos drechos d’autor por coses como la documentación pública de los nuesos conceyos, de los nuesos xulgaos, de les nueses comunidaes… Les empreses pagaron polos sos datos alministrativos, polos sos llistaos de veceros…a última hora, por una inxente cantidá de documentos que, de dala mena, xeneren estos drechos. Y toes eses perres repercutieren nuna organización privada “ensin ánimu d’arriquecimientu”; la SGAE, implicada n’innumberables casos d’abusu, corrupción y malversación de fondos y multada en delles ocasiones pola Comisión Nacional de Mercaos y la Competencia (CNMC)
Pa facese una idega de tolo que cobren, basta con echar una mirada per altu a les más de doscientes páxines que componen el so llistáu de precios, que numbera con una precisión apolmonante cualquier situación na que pueda escuchase música, dende’l bingu o la bolera a la llamada espera d’una centralita telefónica.
Llucía F. Marqués
This work is licensed under a Creative Commons Attribution 4.0 International License.
