L’estremáu xorrecimientu de la violencia esti branu, con fasta 14 asesinatos en 12 dies, evidencia la ineficacia de los medios puestos en marcha pa protexer a les víctimes de les violencies machistes.
Mañana a les siete la tardi, comu ca caberu miércoles de mes, delles organizaciones aconceyarán delantre l’edificiu de La Gota Llechi, en Xixón pa denunciar les consecuencies del patriarcáu y de la violencia contra les muyeres. Una pancarta contabilizará’l númberu d’asesinaes por ser muyeres en tol estáu, una cifra que nun apara de medrar y qu’esti branu ta siendo especialmente llaceriosa, con fasta 14 muyeres asesinaes en 12 díes demientres el mes de xunetu, unos datos que faen rescamplar la inutilidá de les midíes tomaes fasta’l momentu pa finar con esti problema.
Darréu la intervención lleeránse los nomes de toes estes muyeres, cola esperanza de qu’aporte’l mes en que nun se tea d’allargar la llista con nuevos nomes.
Convoca la Plataforma Stop Violencies, qu’acomuña a les organizaciones Andecha Ástur, Anticapitalistes, Amamantar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Susana Sela
This work is licensed under a Creative Commons Attribution 4.0 International License.
