La organización de reivindicación llingüística torna col so espaciu con trece empreses comprometíes col idioma y un diseñu nuevu fechu en cartón

Iniciativa pol Asturianu vuelve a la Feria Internacional de Muestres d’Asturies (FIDMA) con un espaciu anováu. La entidá de reivindicación llingüística torna al eventu más multitudinariu del branu n’Asturies con un puestu remocicáu qu’afonda na caltenibilidá, el respetu al mediu ambiente y la natura. La cita va celebrase nel recintu ferial Luis Adaro de Xixón del 3 al 18 d’agostu.

Trece empreses van tar presentes nesta edición nel espaciu d’Iniciativa pol Asturianu. Les compañíes formen parte de sectores tan diversos como l’agroalimentariu, editorial, audiovisual, moda, infantil, telefonía, industrial y la seguridá. Nesta ocasión repiten Acuto Xuegos, Asturcón Seguridá, Cartonaxes VIR, Cuatro Gotes Producciones, Cerveza Caleya, Mondo Manzana, Nordés Telefonía, Pan Duru, Puru Remangu, Ediciones Radagast, Ringo Rango, Tiza y Peonza y Ediciones Trabe. 

Al traviés d’esta iniciativa, l’asociación pretende facer llegar a los y les visitantes de la Feria de Muestres que l’asturianu ye un elementu que favorez la creación d’empreses y que xenera actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.

Iniciativa pol Asturianu, que nun recibe nengún tipu d’ayuda pública, quier qu’esti espaciu seya un llugar d’alcuentru y un escaparate a la sociedá asturiana de la importancia que tien l’asturianu na economía asturiana. L’espaciu va topase nel pabellón 3-4 del Palaciu de Congresos nel stand 14.

III Día de la Llingua Asturiana

Lo que tamién vuelve a la Feria de Muestres ye la celebración del Día de la Llingua Asturiana. Iniciativa pol Asturianu, en collaboración cola Cámara de Comerciu de Xixón, entama un añu más, y yá van tres, la celebración d’esta xornada dedicada al idioma. La cita va ser el sábadu 17 d’agostu. La organización ta rematando estos díes el programa de la xornada cultural que va ufiertar un bayurosu programa d’actividaes per tol recintu ferial. La entidá de reivindicación llingüística anima a la sociedá civil a participar nesta xornada de valoración y reivindicación del idioma.

Susana Sela

This work is licensed under a Creative Commons Attribution 4.0 International License.