Anantes d’ufrir Asturies comu destín de los teletrabayadores, convién echar una güeyada a les consecuencies d’eses polítiques n’otros países: fuga de talentos propios, alza de precios de la vivienda ya encarecimientu xeneral de la vida, principales consecuencies de priorizar a los “nómades dixitales” frente al bientar de la población
Portugal foi un de los países que s’apuntó con entusiasmu a la fola’l teletrabayu, atrayendo con incentivos fiscales a teletrabayadores al so territoriu, cola idega de que valieren pa dar puxu a la economía llocal, incentivando’l consumu y poblando fasteres pocu habitaes.
L’esperimentu nun salió comu s’esperaba. Sí, acudieron nómades dixitales y sí, afectaron a la economía. El problema ye que’l portugues mediu nun pue competir colos salarios tres vueltes mayores de los nómades, incrementaos amás colos incentivos fiscales qu’ufre’l gobiernu. L’adautación de los mercaos a estos salarios fae imposible la vida a los propios portugueses, forciando la emigración y diezmando la población. La mocedá portuguesa, especialmente, nun pue acceder al mercáu de vivienda, copau por foriatos que quieren afincase nel so país y que puen pagar arriendos muncho mayores.
Pa facese una idega de la desigualdá económica de la que falamos, un de los pocos requisitos necesarios pa conseguir un “visáu nómada” ye cuntar con unos ingresos d’al menos cuatro vegaes el SMI portugués, ello ye, tienen como mínimu cuatro vegaes más poder alquisitivu que los nativos. La fonda fienda pente la población llocal y los recién llegaos, lloñe de derivar comu s’esperaba en mayor riqueza xeneral, afondó nes desigualdaes, adaptando los precios a los sueldos altos y dexando a los portugueses cobrando menos, pagando más y faciendo frente a más impuestos.
La esención fiscal vien de retirase esti añu, pero’l mal ta fechu y Portugal enfréntase a una grave fuga de cerebros pente la mocedá: cuasi’l 40% de los recien graduaos emigren a la gueta de meyores mercaos llaborales y acordies datos del Observatorio de la Emigración de Lisboa espublizaos por Schengen News, el 25% de la población portuguesa vive fuera de Portugal, una cifra a la que ya s’avera Asturies, con más del 20% de la población emigrante de primer xeneración.
Nel Dos Santos
This work is licensed under a Creative Commons Attribution 4.0 International License.
