Emilio Rubio, de la Sidrería La Montera Picona de Ramón, el Camping Deva, Bioparc Acuariu de Xixón y Leonardo Obando reciben los Premios Trayectoria de Visita Xixón

Coincidiendo col Día del Turismu na FIDMA féxose entrega de los I Premios Trayectoria Visita Xixón Profesional que reconocen l’enfotu del d’empreses y entidaes, tanto públiques comu privaes que ponen en marcha actuaciones qu’apuesten pola anovación y la caltenibilidá col envís de reforciar la calidá y la competitividá de Xixón comu destín, afalando un sector turísticu local más competitivu, responsable y sostenible.
La Mesa de Turismu de Xixón, compuesta por axentes venceyaos a l’actividá turístico y lliderao por Ángela Pumariega, vicealcaldesa de Xixón y conceyala d’Economía, Emplegu, Turismu y Anovación, otorgó los I Premios Trayectoria Visita Xixón Profesional nes sos cuatro modalidaes: Trayectoria Profesional, Trayectoria Comprometida, Trayectoria Anovadora y Trayectoria Académica.
Guzmán Pendás, conceyal de Participación y Atención a la Ciudadanía, mercaos y Consumu y Cooperación, foi l’encargáu d’apurrir los premios xunto con dellos representantes de la Mesa de Turismu: Sara Menéndez García, presidenta de la Unión de Comerciantes d’Asturies; Blanca Esther López Rodríguez, representante de la Federación d’Asociaciones Vecinales de Xixón; Montserrat Cañón Cascallana, presidenta del Club d’Empreses de Turismu de Negocios del Principáu d’Asturies; y Alejandra García Rocha, de la Oficina Técnica d’Accesibilidá de COCEMFE ASTURIES.
Caún de los premiaos recibió un troféu creáu pola Asociación Cultural Mercáu Ecolóxicu y Artesanu a partir de maera de castañal d’un “cabornu” de más de 150 años que cayó mientres una nube en 2018. Esta maera, símbolu de fortaleza y nobleza, foi tresformada pa rindir homenaxe al esfuerzu y la dedicación de los galardonaos. Los trofeos tienen, amás, incrustaciones d’acebache, cerámica, vidriu y cueru. Estos detalles reflexen la rica diversidá del nuesu patrimoniu cultural y el talentu de los nuesos artesanos.
Los premiaos son:

PREMIU TRAYECTORIA PROFESIONAL
Esti premiu reconoz a profesionales qu’amosaron el so compromisu col destín y que participaron de manera activa en proyectos pa impulsar el xorrecimientu del sector y el desendolcu de l’actividá turística en Xixón.
PREMIÁU: Emilio Rubio, xerente de la Sidrería Montera Picona de Ramón
Fiel defensor de la gastronomía del país y, cuantimás, de la sidre y l’escanciáu. Por ello, Emilio Rubio foi reconocíu como un de el embaxadores de Cocina de Paisaxe del Principáu d’Asturies. “Ye la nuesa cultura. Trabayar en redol a ella ye tou un luxu” reconoció públicamente. El so apueste pola excelencia traduzse nel bon faer del so establecimientu “La Montera Picona de Ramón”, restorán distinguíu col sellu Compromisu de Calidá Turística y la marca Sidreríes d’Asturies.
Tamién destaca polos llogros consiguíos pol so equipu en múltiples certames, como nel Campeonatu d’Asturies y Mundial d’Echar Sidre, onde demuestra’l so compromisu cola profesionalización del sector. La Montera Picona de Ramón ye la única sidrería de Xixónmiembru del Club Sidraturismo Asturies y Meyor Sidrería 2022 nel certame Xixón de Sidra.

PREMIU TRAYECTORIA COMPROMETIDA

Esti premiu reconoz a profesionales y empreses qu’amuesen el so compromisu cola caltenibilidá de la nuesa redolada y col impactu que xenera’l turismu na nuesa sociedá, amás d’entender la importancia de que’l turismu ye cosa de toos y toes ya inclusivu.
PREMIÁU: Camping Deva-Xixón
Con una trayectoria de 30 años, el Camping Deva consiguió ser un referente turísticu pa Xixón. Cuenta con 4.000 metros cuadraos de zona d’acampada, a los que se sumaron nueves modalidaes d’agospiamientu: cabanes, bungalós, pods o iglúes de madera, tiendes de glamping… Esto demuestra una estratexa anovadora y con visión de xorrecimientu, ensin perder de vista l’equilibriu cola redolada y la sociedá. Amuesa d’ello son les recientes meyores n’eficiencia enerxética, como la istalación de sistemes de aerotermia y d’enerxía fotovoltaica.
Tamién destaca la incorporación de dos bungalós afechos a persones con movilidá amenorgada. Pola so xestión caltenible, el Camping Deva cunta cola certificación Biosphere, contribuyendo al cumplimientu de los Oxetivos de Desendolcu Caltenible (ODS). Ye l’únicu camping d’Asturies que lluz la certificación ‘Q’ calidá turística, dende fai más d’una década, y el sellu Compromisu de calidá Turística.

PREMIU TRAYECTORIA ANOVADORA

Esti premiu reconoz a profesionales y entidaes qu’amosaren el so grau danovación nel sector turísticu llocal al traviés de bones práctiques que contribuyeren al turismu experiencial nel destín, a la busca de nueves ferramientes pa la meyora de la eficiencia empresarial y aquelles iniciatives líderes que constituyan un exemplu a siguir.
PREMIÁU: BIOPARC Acuariu de Xixón
BIOPARC Acuariu de Xixón avera al visitante a la bayura de los ecosistemes marinos. Pa llevar a cabu esta función, destaca la so creatividá a partir d’un programa novedosu y curiosu d’actividaes, como la Visita al Acuariu Ocultu, Les Cenes Sol Mar, Dormiendo con tiburones, ente otres. L’Acuariu tamién destaca nel usu de la tecnoloxía pa crear esperiencies, como la sala de realidá virtual “La Última Frontera”, qu’asemeya un viaxe realista al fondu marín, llanzando un mensaxe de concienciación escontra’l curiau de los océanos.
Amás, sobresal el so restorán ‘KrakenArtFood’, qu’ufierta una propuesta culinaria anovadora y caltenible con una firme apuesta polos saborgos de la mar, los productos de temporada y los ingredientes llocales. Reconozse tamién l’impulsu a la investigación al traviés de convenios col Conseyu Cimeru d’Investigaciones Científiques (CSIC) y con distintes universidaes.

PREMIU TRAYECTORIA ACADÉMICA

Esti premiu ta empobináu a estudiantes del Máster Universitariu en Dirección y Planificación del Turismu de la Universidá d’Uviéu, de cara a aguiyar la realización de Trabayos Fin de Máster rellacionaos cola caltenibilidá turística nel destín Xixón.

PREMIÁU: Leonardo Alberto Obando Torres
Leonardo Alberto Obando Torres recibe’l premiu pol so Trabayu Fin de Máster: “Accesibilidá dixital de los destinos urbanos más competitivos d’España: el casu de Xixón”.
Esti trabayu representa una contribución significativa al campu de l’accesibilidá dixital nel contestu de destinos urbanos, ufiertando un analís refecho y detallao del casu específicu de Xixón. L’estudiu realizáu demuestra un fondu compromisu cola comprensión de los desafíos y oportunidaes qu’enfrenten los destinos urbanos en términos d’accesibilidá dixital. Al traviés d’una metodoloxía rigorosa y una amplia escoyeta de datos, identificáronse les árees clave qu’inflúin na accesibilidá dixital de /Xixón, dexando asina la formulación d’encamientos concretos p’ameyorala.
La relevancia práctica d’esti trabayu tamién merez ser destacada. Nun mundu cada vez más dixitalizáu l’accesibilidá xuega un papel crucial na inclusión y l’igualdá d’oportunidaes. Al centrase nun destín urbanu concretu, el trabayu non solo ufierta conocencies teóriques, sinón tamién encamientos prácticos que pueden tener un impactu real na vida de les persones.

Susana Sela

This work is licensed under a Creative Commons Attribution 4.0 International License.