Rodrigo Cuevas inaugura’l Festival Intercélticu de Lorient con una lleición de baille y gozu maxistral.
Hai públicos desixentes, tibios, serios. Hai públicos entregaos, espresivos. Y dempués ta’l públicu de Rodrigo Cuevas, que ye una categoría propia. Da igual en qué pais y énte qué públicu presente, porque tien recursos pa llevantalos del asientu y ponelos a baillar. Y ye eso lo que fizo la nueche del 11 d’agostu nel Théâtre de Lorient, au fuera presentar el so nuevu discu, Manual de romería (Sony, 2023).
Con él, entamaron los díes grandes del Festival Intercélticu de Lorient (del 12 al 18 d’agostu) nuna edición curtia por mor de los Xuegos Olímpicos de París, que condicionaron la cellebración de festivales y otros tipos de macroeventos nel estáu francés. Sicasí, el piloñés d’adopción xugaba un pocoñín en casa, pues foi ún de los artistes asturianos qu’intervinieron na edición de 2022, añu dedicáu a Asturies.
Como bien alvertíen dende la megafonía del teatru, ye un axitador folklóricu, transformista supremacista y defensor del asturianu, y les dos hores de conciertu coles que deleitó al públicu nun fueron pa menos. Salió dende’l patiu de butaques con BYPA (Baxando yo pela aldea), cantar col qu’abre Manual de romería, pa dempués garrar carrera con MÁS ANIMAL, primer cenciellu, onde’l xuegu de lluces y cabaret desafió la tranquilidá bretona. Con dos temes bien echaos, yá podía pasar a desplicar en francés qué yera eso de la romería, que tien poco que ver cola peregrinación y muncho con tener llibertá, qu’hai que ganala, trabayala y practicala. Y qué meyor tema qu’ALLÁ ARRIBITA, un son más andín nel que se reivindica la microtoponimia de l’Asturies vaciada, pola ruralidá y vivir de manera consciente.
Con too, había quien tovía taba cómodo na butaca, magar el chornu de la nueche, polo que Rodrigo decidió tomar cartes nel asuntu y encoritase pal públicu con un medley del clásicu de Joe Cocker, You Can Leave Your Hat On. Pero pa qu’heba romería, hai que tener reciprocidá: bien aína, toles persones ellí presentes tiráron-y a la cara zamarres, pañuelos y tou tipu de prendes, pa gociar del tar vivos nesi momentu. D’esa manera pudo moyar el deu nel repertoriu del discu anterior (Manual de cortejo, Arís Música 2019) con Arboleda bien plantada.
Y ye que’l públicu nun podía descansar yá, porque Cuevas buscaba de contino la so complicidá con bromes y comentarios sobre la necesidá de modernizar conceptos como la heterosexualidá, el matrimoniu pela Ilesia y la ecoloxía, que remató con VALSE y siguió d’un brinde, a mediu camín ente’l francés y l’asturianu, pa hermanar sentires. Tres esto, picó otra vegada del repertoriu más tradicional con CASARES, otru de los cenciellos del nuevu discu, orixinal del pueblu de Casares d’Arbás, al qu’amestó ritmos pleneros y estrofes en referencia a Xixón y San Juan de Puerto Rico.
Pero nun podía barrer too pa casa, y quixo tener un chisgu pal públicu francófonu con una versión de Laissez-moi danser de Dalida, que punxo a tol teatru en pie pa baillar. Calibró dempués con un cantar más sensual, El día que nací yo. Anque poco pudo recoyer les ganes de vender Piloña: dempués d’enseñar a la xente bretón cómo hai qu’afalar una estrofa de toná, recuperó’l ritmu con CÓMO YE?!, cenciellu más fiesteru y animáu, que siguió col so Xiringüelu de perréu y cortexu. Tres esto, enfrescó’l repertoriu con Veleno, cantar en collaboración col artista gallegu Baiuca, ún de los mayores esponentes del xéneru de la galitrónica.
Poco quedaba na nueche más que dir pensando na resaca emocional del día siguiente, dramatizada con MATINADA (Resaca), cola que fundió l’escenariu na solombra y paeció poner el ramu… Namái pa tornar con Rambalín y desplicar quién foi, qué yera Cimavilla, y cómo exerció la llibertá esi “maricón de nacimientu” nun Xixón que carecía la opresión del facismu.
Había que compensar la tensión emocional con daqué de baille pa empobinar pa los chigres lorienteses, asina que, entós sí, peslló’l repertoriu con Muiñeira para a filla da bruxa y Romería.
En definitiva, una nueche “inaugural” del Festival Intercélticu de Lorient que dexó preparaos ánimos y cuerpos pa los siete díes d’alcuentros culturales, musicales y artísticos na capital del mundiu celta.
Testu: Aymara González Montoto
This work is licensed under a Creative Commons Attribution 4.0 International License.
