Iniciativa pol Asturianu y la Cámara de Comerciu de Xixón en collaboración con una decena d’entidaes entamen esta xornada de reivindicación del idioma
El recintu ferial Luis Adaro, qu’estos díes acueye la 67 edición de la Feria Internacional de Muestres d’Asturies, va celebrar esti sábadu 17 d’agostu’l III Día de la Llingua Asturiana. Una cita qu’entamen a comuña la Cámara de Comerciu de Xixón ya Iniciativa pol Asturianu col sofitu de más d’una decena de collaboradores. El programa recueye una bayura d’actividaes en diferentes espacios que pretenden faer d’esti día una xornada festiva pero tamién de concienciación llingüística.
La xornada va entamar a meudía cola inauguración institucional, que va cuntar con una apertura musical con gaita asturiana y el pregón de Daniella Alumbreros y Maguette Wade. Les tiktokers llangreanes sufrieron una campaña d’acosu en redes sociales por usar l’asturianu nes sos publicaciones. Elles van ser les encargaes d’abrir esta xornada de reivindicación del idioma. Darréu d’ello, van tener llugar les intervenciones d’Álvaro Alonso, secretariu xeneral de la Cámara de Comerciu de Xixón y director de la Feria de Muestres; Ana Vanessa Gutiérrez, conseyera de Cultura, Política Llingüística y Deporte del Gobiernu del Principáu d’Asturies; y Arantza Margolles, vocal de Comunicación d’Iniciativa pol Asturianu. Darréu la comitiva va facer una visita al puestu de l’asociación, qu’abelluga a trece empreses que tienen l’asturianu como seña d’identidá.
El programa va continuar nesi mesmu espaciu a la una de la tarde con un monólogu asturianu modernu a cargu del actor Lluis Antón González y una visita guiada pel Muséu del Pueblu d’Asturies. Al mesmu tiempu, nel espaciu d’Avilés, el conceyal David García va desgranar la programación de la Conceyalía de Normalización Llingüística pal segundu semestre del añu.
Yá pela tardi la conseyera de Cultura, Política Llingüística y Deporte va participar, xunto col alcalde de Samartín del Rei Aurelio, Xosé Ramón Martín Ardines, na presentación de la obra ‘Lletres a les sombres de los castilletes’. Trátase d’una reedición del llibru espublizáu pol Conceyu de Samartín del Rei Aurelio. L’actu va tener llugar nel espaciu d’Hunosa.
De magar les cinco la tardi, el Conceyu d’Avilés nel espaciu que comparte col Puertu d’Avilés va proyectar el videu ‘El Cañón d’Avilés o Caladeru de Carrandi’, en collaboración cola Fundación Diversidá del Ministeriu de Transición Ecolóxica y Retu Demográficu, afondando na temática marinera del propiu stand del conceyu avilesín.
A partir de les siete la tardi, nel puestu de La Nueva España, va celebrase una presentación de ‘Surdiversu’, una antoloxía de 50 años de poesía asturiana’ na que s’amuesa una escoyeta de poemes de les obres espublizaes nel mediu sieglu últimu. L’actu va tar presentáu por Berto García y van participar dellos poetes qu’apaecen na obra.
Nel espaciu de Llangréu a les siete y media de la tarde, l’espertu en gastronomía David Castañón va desplicar el procesu d’ellaboración de la sidra y va faer una tastia d’esta bebida.
Amás, durante tola xornada habrá actividaes pa tolos públicos. Nel puestu d’El Comercio los y les visitantes de la Feria de Muestres van poder proponer cuála ye la pallabra más prestosa n’asturianu. Toles semeyes van poder vese na páxina web del decanu de la prensa asturiana. Per otru llau, l’espaciu de Conceyos con Encantu va poner a prueba los conocimientos de la reciella. Tolos neños y neños que quieran van poder recoyer de baldre un mapa mudu d’Asturies pa coloriar y llocalizar los conceyos. La Universidá d’Uviéu y la Oficina de Normalización Llingüística de Xixón tamién va participar d’esta xornada con un repartu de materiales n’asturianu.
Más d’una decena d’entidaes ente espositores, instituciones y empreses collaboren nel programa d’actividaes con motivu del Día de la Llingua Asturiana. Toles actividaes son de baldre y tan abiertes a la participación de los y les visitantes. Iniciativa pol Asturianu anima a la sociedá civil a participar nesta xornada de valoración y revindicación del idioma.
Nel Dos Santos
This work is licensed under a Creative Commons Attribution 4.0 International License.
