4 nueches nel estadiu Moustoir, dende’l llunes 12 al xueves 15 (a les 21:45), pa esfrutar de tolos grupos de les naciones celtes.
Quien vien a Lorient a facer turismu tien nidio qu’hai daqué que tien que ver sí o sí, de toles cites del Festival Intercélticu: l’espectáculu Horizons Celtiques, tamién conocíu como Nuit Interceltique n¡ediciones pasaes. Camudaron los nomes, pero non la esencia del formatu: ye una oportunidá única pa ver a tolos grupos participantes nel festival, muerganizaos por delegaciones, y esfrutar de manera cómoda del interceltismu.
Ye vezu cada añu qu’abra’l país anfitrión, representáu pol Bagad de Lann-Bihoué, banda de gaites de la base aeronáutica y naval del golfu de Morbihan. Sicasí, la edición tien por envís destacar la mocedá celta y pa redondiar la intervención bretona contaron col grupu Les jeunes de Kenleur et leurs géantes, qu’agrupa reciella de tolos departamentos de la rexón.
Pero nun queremos estropiar la sorpresa con llargues descripciones de cada actuación. Asina, si vos entrugarais pol orde por delegación, dexámosvos un llistáu rápidu de tolo que podéis ver nel Horizons Celtiques 2024:
- BRETAÑA: Bagad de Lann-Bihoué y Les jeunes de Kenleur et leurs géantes.
- IRLANDA: Rinceoirí Cois Laoi (conxuntu musical y riverdance), Cliona Ni Ghallachoir (canción irlandesa tradicional), Piobairi na Munhan Pipe-Band (banda gaites).
- ASTURIES: Banda de Gaitas La Laguna del Torollu y Banda Sinfónica del Ateneo Musical de Mieres (música) y Escontra’l Raigañu (baille).
- ISLLA DE MANN: Ny Fennee (música y baille).
- GALES: Côr yr Urdd (coru mozu mixtu tradicional).
- GALIZA: Banda de Gaitas Arume de Malvas (música) y Rebulir (baille y pandereta).
- CORNUALLES: Kekezza (música y baille).
- ESCOCIA: George Heriot’s School Pipe Band (música), Lorient Festival Highland Dance Team (baille de les Highlands).
Con too, la meyor parte ye’l pieslle; asina que, si queréis saber cómo ye… Vais tener que venir.
This work is licensed under a Creative Commons Attribution 4.0 International License.
