Dende Andecha Astur denuncien el duple raseru emplegáu pola Xusticia española a la de valorar los actos públicos, “dándose una estraordinaria permisividad p’aquellos actos d’esaltación facista españolista mentes se xudicialicen y reprimen espresiones públiques del ámbitu de la izquierda”

Andecha Astur denunció ante Fiscalía los actos facistes nel monumentu a los “Héroes de Simancas” ocurrios el 28 de xunu, cuando tuvo llugar una concentración nel trescursu de la que s’interpretaron cánticos franquistes, incluyendo el cara al sol, realizándose al tiempu saludos facistes. Ante la falta de reacción amosada tanto pol Conceyu Xixón comu pol Principado y por tolos partios que se dicen democráticos y que nun gutiaron, Andecha Astur unvió entós un escritu solicitando a Fiscalía qu’investigue la so llegalidá y actuare en consecuencia.

Comu rempuesta, n’escritu robláu pol Fiscal Xefe de la Área de Xixón -D. Alberto Rodríguez Fernández alcuérdase l’archivu de les dilixencies previes abiertes tres la denuncia de Andecha Astur polos actos facistes que tuvieron llugar el pasáu 28 de xunu.

N’opinión del fiscal, estos fechos constitúin “l’exerciciu lexítimu del drechu fundamental de la llibertá d’espresión”, amestando que “dichos actos nun suponen una conducta empobinada escontra la discriminación sectaria frente a un determináu grupu o los sos integrantes”.

Dende Andecha Astur denuncien otra vuelta’l “duple raseru emplegáu pola Xusticia española a la de valorar los actos públicos, dándose una estraordinaria permisividad p’aquellos actos d’esaltación facista españolista mentes se xudicialicen y reprimen espresiones públiques del ámbitu de la izquierda. -como exemplu’l recién casu conocíu como’l de les ’6 de la Suiza’- y el soberanismu”.

Destaquen tamién comu con estos fechos torna quedar n’evidencia les múltiples faltes de la Llei de Memoria Hestórica, “que permite que sigan realizándose espresiones d’esaltación de los actos facistes y criminales del franquismu”.

Nel Dos Santos

This work is licensed under a Creative Commons Attribution 4.0 International License.