“8 Setiembre.Güei celébrense munchos Días de Asturies, pero namás qu’un actu cellebra’l díi de la Nación Asturiana. N’Andecha Astur sabemos que’l día de güei nun tien de ser un díi de folixa, entá non, queda muncho por avanzar, por facer, por lluchar nesti país.” 

Na concentración del 8 Setiembre, qu’Andecha Astur cellebró al pie del Monumentu a Belarmino Tomás en La Felguera, Llucía Fernández fexo un llamáu al optimismu, la xunidá la llucha, afirmando qu’hai soluciones frente a la llaceriosa situación socioeconómica y de perda identitaria y cultural que carez Asturies “Les coses pueden cambiar. Podemos camudales. Tamos nun momentu nel que los asturianos y asturianes tenemos que decidir si permitimos el desaniciu d’Asturies o alzamos la cabeza y reclamamos –como ya ficimos más vegaes- pa nosotros el drechu d’escoyer el nuesu futuru”

Llamentó tamién la falta de xunidá d’aición pa esti díi, “ante’l desenfotu xeneralizáu de la izquierda que se diz asturiana, que lleva a la inaición nun díi tan importante o a convertilu nuna folixa valera de conteníu” recordando qu’Andecha Astur lleva tiempu tendiendo la man a toes aquelles organizaciones que tean como oxetivu la vindicación de la nación asturiana y los drechos sociales de los asturianos, pa finar colo que llamó el monopoliu de los partíos sucursalistes nel nuesu país, al serviciu de los intereses de Madrí.

Tócanos, por nosotros y polos que vienen tres de nos, garantizar la nuesa sobrovivencia como Pueblu y llevar alantre’l necesariu procesu de recostruición nacional y social que fine cola situación d’anguañu, Tócanos algamar un futuru meyor p’Asturies y podeis cuntar con nosotros pa ello.

Nel Dos Santos

This work is licensed under a Creative Commons Attribution 4.0 International License.