La mesma Conseyería de Cultura, Política Llingüística y Esporte qu’afirmaba refugar y condergar les concentraciones de sofitu al franquismu empecipió los trámites para l’estudiu del monumentu de los héroes del Simancas como bien d’interés cultural (BIC)
La escultura en cuestión, allugada na fachada del Colexu de la Inmaculada, rinde homenaxe a los militares que se xunieron a les tropes de Franco na Guerra Civil dende l’entós cuartel xixonés, onde fueron duramente asediaos hasta la so derrota.
La solicitú pa otorgar esi honor al monumentu llega dende l’Asociación Reivindicativa de la Memoria Histórica Raigaños, con see en Santa Cruz de Tenerife. Esta asociación yá intentó ensin ésitu impugnar la retirada de la Medaya al Méritu nel Trabayu a Francisco Franco, un recursu que foi refugáu pol Tribunal Supremu.
Les reacciones nun se fixeron esperar y dende la esquierda asturiana llevantáronse yá voces destacando lo desaveniente de declarar Bien d’Interés Cultural un monumentu d’implicaciones tan claramente fascistes qu’entá anguañu, cola connivencia de les autoridaes, siguen celebrándose énte él actos d’esaltación del réxime franquista español; tantu ye asina que en 1939 el dictador concedió al llugar nel so conxuntu la Cruz Galardonada de San Fernando, la más alta condecoración que otorga España.
Dende Andecha Ástur dieron a entender que non solo nun tendría de reconocer se como BIC sinón que lo correcto sería baltalo, al igual qu’otros símbolos del franquismu entá presentes nes nueses ciudaes “Demientres más de 40 años de gobiernos d’esquierda (PSOE-IU) n’Asturies y en Xixón negándose a retirar símbolos franquistes, agora tan estudiando declarar a ún d’ellos Bien d’Interés Cultural” comenten con indignación nes sos redes.
Nel Dos Santos
This work is licensed under a Creative Commons Attribution 4.0 International License.
