La Policía Nacional identificó y presionó a abandonar l’actu a dellos miembros de Asturies por Palestina qu’escuchaben el pregón con banderes palestines

El pasáu vienres 13 de setiembre tuvo llugar n’Uviéu el pregón que daba aniciu a les folixes de la ciudá, San Mateo. Nel mesmu, como ye vezu, destacaben pente’l públicu colectivos sociales coles sos pancartes y banderes, aprofitando’l pregón pa visibilizar les sos revindicaciones. Asina, los activistes de Salvemos La Vega desplegaron una gran pancarta en defensa del conxuntu históricu industrial y dellos miembros de la plataforma Asturies por Palestina acudieron a la plaza con banderes palestines, pa recordar el xenocidiu que continúa nesi país ocupáu.

Estos caberos foron los que, mientres escuchaben tranquilamente a la científica y espresidenta delCSIC Rosa Menéndez falar nel so discursu d’una ciudá “abierta, inclusiva y diversa y al mesmu tiempu fiel a la so sencia”, foron interpelaos por dellos policies nacionales que, n’actitú menaciante, mandáronyos retirar les banderes, identificándolos “con calter previu”, ello ye, anantes de que cometieren dengún delitu nin estorbaren de denguna mena la convivencia dientro l’actu. 

Ante esi abusu d’autoridá, Andecha Astur pidió desplicaciones a Adriana Lastra, Delegada del Gobiernu español, comu responsable que ye de l’aición policial. “La criminalización a la solidaridá col pueblu palestín ye inaceutable” declararon.

Asina mesmo denuncien la falta de rempuesta del Principado, al que-y desixen qu’asuma les sos responsabilidaes faciendo otru tantu, pidiendo tamién que s’esclarie tan inaceutable comportamientu.

Nel Dos Santos

This work is licensed under a Creative Commons Attribution 4.0 International License.