Depués de trés convocatories de personal interín y col cursu yá entamáu siguen recibiéndose quexes de centros educativos por falta de personal
Mientres el departamentu de comunicación de la Conseyería d’Educación presume d’inversión récord n’inclusión y atención a la diversidá, con titulares tan efectistes como “el Gobiernu d’Asturies refuerza’l papel de los orientadores y l’inclusión” la realidá nos centros escolares ye bien otra.
SUATEA aconceyó con responsables de la Conseyería d’Educación pa poner en so conocencia la realidá que ta careciendo l’Institutu Pérez de Ayala, nel barriu uvieín de Ventanielles, onde, amás d’otros retayos en distintos departamentos, pasen de tener dos orientadores a un solu.
Trátase d’un centru nel que s’envalora qu’alrodiu del 30% del alumnáu ye vulnerable y yá el pasáu cursu, con dos profesionales, el Departamentu d’Orientación víase enchíu p’atender les necesidaes de los menores.
“La falta de recursos sigue siendo la tónica xeneral n’una gran mayoría de los centros públicos asturianos, ente que se sigue financiando a la rede privada-subvencionada. L’acción d’un gobiernu que presume de progresista tendría de centrase n’ayudar a los sectores que más lo precisen, lo cual inclúi a esos barrios populares onde nun lleguen otros recursos” declaren dende’l Sindicatu d’Ensiñantes.
Susana Sela
This work is licensed under a Creative Commons Attribution 4.0 International License.
