El Salón Internacional de les Sidres de Gala va tener llugar del 26 al 29 de setiembre, siendo el sábadu 28 la Xornada de Tastia Abierta al Públicu, que va tener llugar nel Salón de Congresos de la Feria Internacional d’Amueses d’Asturies n’horariu de 12 a 15 h. y de 17 a 20 hores, ufriendo más de 200 productos sidreros
La Casa Paquet, See de Turismu del Conceyu de Xixón, fue l’escenariu nel que tuvo llugar la presentación del mayor eventu sidreru de calter internacional que se cellebra n’Asturies.
Na presentación participaron Carmen Pérez, de la Fundación Asturies XXI, el Conceyal de Ciudadanía Guzmán Pendás, Marcos Abel Fernández, Presidente de la Fundación Asturies XXI y Antonio Migoya, representante de la Fundación Caxa Rural de Xixón, entidá que lleva abondos años sofitando esti eventu.
Abrió la rueda de prensa Carmen Pérez, quien resaltó que la variedá de productos novedosos que s’alcuentren nel SISGA son “Una amuesa de que la cultura asturiana de la sidre ta vivo, evoluciona y vive nel siglu XXI”. Guzmán Pendás pela so parte, espresó’l so prestu por presentar esti Salón afirmando que “ Eventos como esti asitien a Xixón y a Asturies como referencia internacional na sidra”. Pendás animó a los asturianos más “de cultura chigrera” a abrir la mente a toles posibles espresiones de la sidre.
Pela so parte, Antonio Migoya, representante de la Fundación Caxa Rural de Xixón, collaboradora d’esti eventu casi dende los sos entamos, destacó la importancia de la sidra a nivel mundial, destacando que los productos que van tar disponibles nel SISGA son una evolución natural de la sidra na qu’hai que siguir trabayando y destacando la importancia de los llagareros d’otros países como embaxadores, yá non de la sidra asturiano, sinón de Asturies y los sos productos.
El Presidente de la Fundación Asturies XXI destacó el compromisu de los más de cien llagares de sidre de tol mundu que faen llegar equí la so sidre, pesi al aisllamientu secular d’Asturies que torga los desplazamientos y unvios de sidre. Ello ye posible, afirmó, gracies al reconocimientu internacional del SISGA y al posicionamientu d’Asturies comu referente de calidá na ellaboración de sidre.
Marcos Abel resumió el programa, -accesible en sisga.info- enllenu d’actos oficiales, tasties, degustaciones, charres y eventos sidreros que procurarán l’averamientu de la cultura sidrera asturiana a los participantes en el SISGA. Como novedá destacó la coincidencia de la preba abierta del SISGA cola celebración d’AGROPEC, nel recintu de la Feria de Muestres, y la creación d’un eventu específicamente dedicáu a los productos con DOP asturianos, a traviés d’un maridaxe conxuntu de sidres asturianes con Alimentos del Paraísu.
La cita principal pa’l públicu xeneral va tener llugar el sábadu nel Salón de congresos de la FIDMA cola esposición de productos al públicu onde, por namás diez euros, non solo podrán probase toes estes sidres sinón que va tenese el privilexu de poder falar directamente colos llagareros de too el mundu. Anque l’actu abiertu masivamente al públicu va ser la Tastia del sábadu, hai un reducíu númberu de places disponibles pal restu d’actos a los que s’hai qu’apuntar previamente.
El programa presllará col Brunch de Gala nel Llagar Finca El Duque, nel que se fadrá entrega de los Premios SISGA, que ya cuenten con un fortísimu renombre a nivel internacional y que garanticen la so ecuanimidá mediante el peculiar sistema de tener un xuráu internacional formáu polos propios llagareros participantes.
Alberto Rodríguez
This work is licensed under a Creative Commons Attribution 4.0 International License.
