Comu media, un asturianu gana 5.781 euros más al añu qu’una asturiana. Los caberos datos recoyíos na Encuesta d’Estructura Salarial espublizada pol Institutu Nacional d’Estadística (INE) apunten a que sedría preciso subir el salariu de les muyeres hasta cerca d’un 20% pa igualalu al de los homes, una fienda qu’alluga a Asturies nun de los piores puestos de la llista d’ente tolos territorios del estáu. 

Non solo cobren menos, sinón que yos cuesta más alcontrar trabayu; la tasa de paru femenín ye del 12,43%, en comparación cola de los homes, del 11,16%. Incluso nel cobru del desemplegu les muyeres perciben prestaciones cuasi un 11% menores. Pero onde la fienda resulta vraeramente xabaz ye pente les pensionistes, con ingresos un 78% menores a los homes nes mesmes circustancies. 

Estos menores salarios desplíquense porque les muyeres ocupen puestos de menor nivel y  los sectores con condiciones más precaries tienen más pesu d’emplegu femenín, pesi a que les muyeres tienen de media una formación superior a la de los homes.

La causa nun ta solo na reticencia a poner a muyeres n’altos cargos nes empreses, sinón sobre tou nes dificultaes estra que les muyeres tienen y tuvieron pa conseguir y caltener un bon trabayu. Pesi a tola llucha desendolcada nesi sen, ye un fechu que los curiaos a dependientes y les xeres d’atención a la reciella continúen recayendo principalmente nes muyeres, complicando ya interrumpiendo la so carrera llaboral, cuestión que amás ye utilizada como argumentu polos encargaos de recursos humanos pa priorizar la contratación y promoción de homes perriba de les sos compañeres. 

Llucía F. Marqués

This work is licensed under a Creative Commons Attribution 4.0 International License.