APIAST surde d’una necesidá de dar a conocer l’oficiu n’Asturies, promover y dignificar el sector de la ilustración asturiana, defender los sos derechos d’autoría y facilitar el resolvimientu de los principales problemes colos que s’atopen los sos profesionales
La illustración ye una disciplina artística por sí mesma que consiste na representación gráfica d’un mensaxe, yá seya esti escritu o metafóricu. La so función ye la de xenerar creaciones visuales pa comunicar, espresar, interpretar o complementar un testu, conceutu o procesu. Sicasí, fasta bien pocu, Asturies nun cuntaba con un organismu qu’acomuñara esti coleutivu y defendiere los sos intereses; esi ye l’envís que persigue APIAST, facilitando’l resolvimientu prácticu de los principales problemes colos que s’atopa l’oficiu y cooperando con otres asociaciones o colectivos allegaos auniendo esfuerzos.
L’asociación acomuña a profesionales asturianos de tolese estayes de la illustración: editorial, cómic, prensa, publicidá, animación, videoxuegos, testil, productu, mural, etc.,tantu profesionales n’activu, como estudiantes, xubilaos, y tamién otres persones que sienten interés pola illustración.
La Xunta Directiva ta formada poles illustradores Eva Rami (presidenta), Ana Reguera, más conocida como Sra.Milton, (ayalguera), l’illustrador Enrique Fernández (vicepresidente y secretariu), cuntando, amás, col sofitu de la impulsora de l’asociación, Isabel Muñoz (Isabel MG), quiem mos cuenta que tou empezó en 2019 tres les Xornaes “Asturies Diseña”, nes que moderó l’alderique “L’illustrador profesional agora”. Adulces llogró arreyar nesta iniciativa a dellos compañeros y compañeres d’oficiu que fueron
trabayando al so llau mientres estos años pa maurecer la idea y consiguir consolidase oficialmente como asociación en 2024, entamando la so actividá con más de 40 persones acomuñaes.
De la man d’otres asociaciones de ilustradores con llarga trayectoria, como APIM (Madrid), AGPI (Galicia), APIC (Cataluña), APIV (Valencia), EUSKAL IRUDIGELEAK (Euskal Herria), lo mesmo que de FADIP (Federación d’Asociaciones D’Illustradores Profesionales) y del colectivu Arte Ye Ética, esperen dir medrando, ya illustrando Asturies coles pincelaes d’esta preciosa pero, al empar, casi desconocíu oficiu.
Susana Sela
This work is licensed under a Creative Commons Attribution 4.0 International License.
