N’Asturies el pluriemplegu medra el duple que n’España, un 42,4% nos caberos cinco años
Ya nun se trata de que los paraos pasen apuros pa llegar a fin de mes, n’Asturies coles actuales condiciones llaborales tener trabayu tampocu garantiza un bon nivel de vida. D’ehí que ca vuelta seyan más los asturianos y asturianes que necesiten un segundu trabayu pa completar ingresos.
El sector servicios, especialmente la hostelería, llimpieza y curiaos, cientren les ocupaciones de les persones con pluriemplegos, trabayos mui precarios y con un altu índiz de feminización, ya que la mayoría de les persones nesta situación son muyeres.
Nun ye namás n’Asturies, en tol estáu algamóse un récor hestóricu de persones pluriemplegaes, con un xorrecimientu del 20,6% en comparanza col 2019; pero ye que n’Asturies esi xorrecimientu duplica, hasta’l 42,4%.
El pluriemplegu ye una cara más de la precariedá llaboral asturiana, sumada a la inflacción y sobre tou, al descomanáu incrementu de precios de la vivienda n’Asturies. “Col primer trabayu pago la casa, col segundu, vivo”, cuenta N.M.F, camarera los fines de selmana y repartidora postal per semana, que sicasí nun pue permitise aforrar.
Nun pue escaecese tampocu la influyencia del pluriemplegu nos accidentes llaborales causaos por mor del cansanciu.
This work is licensed under a Creative Commons Attribution 4.0 International License.
