240 espertos d’Europa ya Iberoamérica acomuñen en Xixón p’aldericar cuestiones claves como l’impactu de les plagues en cultivos agrícoles o’l papel d’ácaros ya insectos como tresmisores d’enfermedaes pal ser humanu o’l ganáu.
Xixón acueye, del 7 al 11 d’ochobre, el XIII Congresu Nacional d’Entomoloxía Aplicada gracies a investigadores del SERIDA y de la Universidá d’Uviéu.
La entomoloxía yel’estudiu científicu qu’ayuda a entender la importancia de los insectos nel mundu natural y social. Dende fai más de 400 millones d’años, los insectos son el grupu animal más diversu y cuantioso y l’oxetu d’estudiu d’esta ciencia.
El Congresu Nacional d’Entomoloxía Aplicada ye un puntu d’alcuentru d’investigadores pa la presentación de les últimes novedaes n’I+D+i. Estos entomólogos estudien, por casu, los daños que producen les plagues en cultivos agrícoles y forestales, ya inclusive nel ámbitu urbanu, buscando les estratexes de control más sostenibles y respetuoses. Tamién investiguen el papel que xueguen ácaros ya insectos como vectores d’enfermedaes d’importancia pal ser humanu o’l ganáu.
La entomoloxía aplicada ciéntrase nos insectos d’interés pal ser humanu, yá seya polos productos qu’apurren, como pol impactu que causen nos bienes del home, comu plagues, insectos controladores de les mesmes, tresmisores d’enfermedaes al home y al ganáu, polinizadores etc…
Dientro de la ciencia que se fai n’Asturies nesta materia, investigadores del SERIDA y de la Universidá d’Uviéu van presentar nel congresu trabayos sobro’l control de plagues en cultivos d’arándanos, la xenética de l’abeya melífera asturiana, los ácaros vectores d’enfermedaes venceyaes a plagues de topinos o los escarabayos coprófagos que reciclen los nutrientes del suelu.
El Congresu inclui trés conferencies plenaries que van tratar sobro’l papel de los insectos polinizadores na agricultura, la importancia de la entomoloxía na Salú Global y la relevancia de los esperteyos como controladores de plagues causaes por insectos.
Ignasi Bartomeus, Científicu Titular del CSIC na Estación Biolóxica de Doñana va faese cargu de la primera. Estudia ecoloxía de comunidaes (sobremanera les interacciones ente plantes y abeyes). La so llínea de trabayu principal trata d’entender cómo distintos factores del cambéu global impacten sobro la cadarma y composición de les comunidaes de plantes y polinizadores, y como esos impactos afecten al funcionamientu del ecosistema. Publicó más de cien artículos científicos, incluyendo artículos en revistes de primer nivel como Science o PNAS. Amás, ye divulgador en revistes especializaes como Quercus o’l blogue La cuadradura del círculu y autor de dellos llibros.
Eva María Frontera Carrión ye Profesora Titular n’área de Parasitoloxía na Facultá de Veterinaria de la Universidá d’Estremadura y directora del departamentu de Sanidá Animal de dicha universidá. Va poner de relieve la importancia de la entomoloxía na salú global: de seres humanos y animales. Empieza los sos estudios sobre ectoparásitos y vectores d’enfermedaes, centraos primeramente na oestrosis ovina, magar darréu la so actividá investigadora centróse n’otros insectos vectores voladores, especialmente mosquitos. Nestos últimos años tamién desenvolvió les sos investigaciones n’aspeutos epidemiolóxicos del virus del Nilo occidental. Anguañu tien dellos convenios col Serviciu Estremeñu de Salú (Xunta d’Estremadura) y empreses privaes, collaborando na xixilancia del mosquitu tigre y otros vectores d’enfermedaes nesta comunidá. Amás ye la coordinadora del grupu d’investigación PARUEX, grupu multidisciplinar integráu por 16 miembros de distintos ámbitos sanitarios.
Xavier Puig Montserrat trabaya nel grupu d’investigación BiBio, del Muséu de Ciencies Naturales de Granollers. Mientres los sos primeros años de dedicación a los esperteyos los sos trabayos centráronse na catalogación y l’inventariu de comunidaes n’espacios protexíos, pa dempués focalizar el so doctoráu y bona parte de la so actividá actual nes interacciones ente esperteyos y agroecosistemes, y poro nel papel d’estos mamíferos nel control de plagues.
El SERIDA, con sede en Villaviciosa, y el trabayu de nivel de los sos investigadores ya investigadores foi la causa de que la ciudá acoyera a lo llargo de los años más d’una decena de xuntes científiques, como esta d’altu nivel.
Amás del trabayu en sala, en Llaboral Ciudá de la Cultura, los congresistes van realizar una salida de campu visitando’l Xardín Botánicu Atlánticu y van asistir a una demostración del procesu d’ellaboración de sidra n’un llagar.
Alberto Rodríguez
This work is licensed under a Creative Commons Attribution 4.0 International License.
