En Xixón nun podíen ser menos babayos que n’Uviéu y van llantar, al estilu más puru colonialista y por propuesta de VOX, una megabanderona del reinu d’España.
Namás el mástil, vien d’anunciar mui enchipáu el conceyal de Relaciones Institucionales de Xixón, Jorge González-Palacios, va costar 65.000 euros (impuestos, obra ya encofráu aparte)
65.000 euros son 23.000 más que los que’l Conceyu de Xixón presupuestó el pasáu exerciciu, por casu, pal Centru de Día de la Fundación Siloé, nes que s’atienden les necesidaes de menores d’edá en situación de riesgu, vulnerabilidá o desprotección social, son más del triple de lo destinao a la Fundación Bancu d’Alimentu d’Asturies o diez vegaes más que lo dedicao a “ediciones lengua y cultura asturianas”.
Con 65.000 euros (perres que, recordemos, pagamos tolos xixoneses) financiaríense 650 beques de material escolar, cinco families viviríen l’añu enteru, mercaríense 32 silles anfibies adaptaes pa posibilitar l’accesu a la playa a persones con problemes de movilidá. Hai infinidá de destinos meyores qu’un palu de 25 a 30 metros nel qu’escolingar un trapu de vergoña.
Esta bandera xigante foi la primer propuesta fecha oficialmente por Sara Álvarez Rouco, única componente actual del grupu municipal de VOX. La proposición, que ya se fexo nel 2014 y nel 2019, foi votada en xineru, saliendo alantre colos votos a favor del PP, VOX y Foro, llanzando a Xixón a la campaña d’apoloxía del españolismu na qu’Uviéu ye cabezalera, nun ridículu y humildante exerciciu de ver quien la tien más grande (la bandera).
Afortunadamente, supongo, González Palacios almite que nun ye “una obra urxente” y que nun tienen priesa por entamar la instalación, que gracies al aire que sopla nella nun va ser nel Humedal. Con un pocu de suerte y l’avezada eficiencia igual lo dexen pa prau.
Nel Dos Santos
This work is licensed under a Creative Commons Attribution 4.0 International License.
