Primero faltó’l túnel, lluéu les llocomotores y finalmente el problema ye que nun hai vagones
Los ferrocarriles asturianos nun llevanten cabeza. Si va unos díes falábemos de la suspensión de trayectos de cercanies pola escasez de trenes de pasaxeros en RENFE, nesti casu son los tresportes de mercancies los afectaos, suprimiéndose servicios ya contrataos pa llevar cargues pente Asturies y la Meseta.
La entrada’n serviciu de la Variante Payares, va cuasi un añu, facíase con grandes esperances nella como incentivu de l’actividá económica y el tresporte ente Lleón y Asturies, resalvando la dificultá de sacar mercancies a España qu’implica l’Autopista del Güerna. Pero el fechu ye qu’esi tresporte nun arranca. Agora qu’hai variante nun hai trenes. Va pocu, la transición de mercancíes a la Variante dependía de les llocomotores; agora, solucionáu’l suministru de máquines tractores, escaseen los vagones. Cabe entrugase si una bones tengan vagones nun faltarán los conductores.
Un cuentu de nunca finar agraváu pol fechu de que, entantu se paraliza’l tresporte de mercancies, más de mediu centenar de vagones pigacien nes áries de reparación por desperfechos o averíes nel sistema de rodadura.
Alberto Rodríguez
This work is licensed under a Creative Commons Attribution 4.0 International License.
