Un añu más el duple homenaxe d’Andecha Astur a la Revolución d’Ochobre nes figures de los Mártires de Carbayín y Belarmino Tomás tuvo enllenu d’emoción, alcordanza y deseyu de futuru.
“Los que llucharon n’Ochobre del 34 yeren los nuesos güelos, xente normal, como nos, que supo xunise perriba les sos diferencies pa defender lo que teníen claro, que yeren pueblu, que yeren trabayadores y que yeren asturianos” Marcos A. Fdz
A les 12:30 tuvo llugar la primer cita, ante’l monumentu que nel Cimenteriu de Carbayín remembra l’asesinatu de 24 sierenses comu represalia española, una bones ya se firmare’l pautu col que finare la revolución y que fore xabazmente incumplíu pol gobiernu de la República Española, “con mentires, traiciones y asesinatos” comu fexo notar na so intervención Llucía Fernández Marqués, quien destacó tamién la importancia de “recuperar l’enfotu y la fe en nos mesmos d’aquellos asturianos, arrampluñada por décades de represión qu’entá continúa”.
Darréu los actos desplazáronse al cimenteriu de Pando, onde reposen los restos de Belarmino Tomás, presidente d’Asturies y del Comité Revolucionariu, onde tres de la ufierta floral d’homenaxe Marcos A. Fernández tuvo unes sentíes pallabres de reconocimientu a Belarmino y a aquelles persones que foron quien a declarar, non una, sinon dos vegaes, la so independencia, primero cola República d’Obreros y Campesinos d’Asturies (la ROCA) nel 34 y col Conseyu Soberanu d’Asturies y Lleón, nel 37.
La placa qu’a la entrada el Cimenteriu recuerda a Belarmino, esaniciada nuevamente por aquellos a los que nun yos presta la memoria heróica c’Asturies, foi repuesta y l’actu presllóse, comu ye vezu, cola interpretación de La Flor del Agua.
Llucía FM
This work is licensed under a Creative Commons Attribution 4.0 International License.
