Pesia les sos promeses, la Conseyería de Transición Ecolóxica, Industria y Desendolcu Económicu d’Asturies vien d’autorizar otru parque eólicu na Reserva de la Biosfera del ríu Eo, Ozcos y Tierra de Burón
Vien d’espublizase nel BOPA l’autorización para llevantar un parque eólicu con 5 molinos de 5.000 KW.en Peña Bou, que va afectar a los conceyos de Castropol y A Veiga. Na actual Reserva de la Biosfera yá tán furrulando 5 parques eólicos (Candal, Chao das Grallas, Bobia, Villanueva, A Xunqueira) hai 8 autorizaos (Vientu Castelo, Eirua, Folgueiras, Chao Gran, Santalla, Pousadoiro, Turia) y otros 11 parques proxectaos.
Estos parques eólicos y les sos llinias d’evacuación van tar allugaos dientro la reserva de la biosfera y van afectar a los espacios naturales y a la parte d’especial protección comuñal. Dende la Coordinadora Ecoloxista dieron la voz d’alarma al considerar desaxeradamente peligroso’l que se permitan instalaciones con eleváu impactu en zones protexíes, y entienden que “el Principáu ta maniobrando para colar esti tipu de parques n’espacios naturales”.
Ello a pesar de que’l Gobiernu d’Asturies declarare na Xunta Xeneral na pasada llexislatura que “Va escluyise’l desendolcu de parques eólicos en parques naturales y zones protexíes”.
Hai que recordar que l’espoxigue de los parques eólicos n’Asturies tuvo llaráu d’irregularidaes, dalgunes ensin resolver, como ye la de que tou esti conxuntu de parques tendría de sometese a una Evaluación Ambiental Estratéxica (EAE) d’alcuerdu a la Directiva 2001/41/CE y d’alcuerdu a la Llei 9/2006, de 28 d’abril, sobro evaluación de los efectos de determinaos planes y programes nel mediu ambiente.
Alberto Rodríguez
This work is licensed under a Creative Commons Attribution 4.0 International License.
