Bonos díes, bona xente.
Alborecemos col cielu poco nuboso o escampláu con unes temperatures que tan alrodiu de los 12ºC, rexistrándose nel puirtu Payares 8,1ºC.
Güei, cola llegada d’un frente atlánticu, dirá n’aumentu la nubosidá pa dexanos el cielu nuble a partir del mediudía, yá pela tarde tendremos precipitaciones febles, entamando pel ocidente onde sedrán dalgo más abondoses y reactivándose una vegada lleguen a la fastera oriental d’Asturies, na central ye onde menos precipitará siendo febles ya ocasionales. Les temperatures másimes en descensu, mentantu que les mínimes camudarán poco. L’aire sedrá feble, soplando ábrigu pela mañana y gallegu na tarde.
Mañana martes seguiremos col cielu mui nuboso a primeres hores ya con precipitaciones febles en forma d’orpín, nel trascursu del día dirán desapareciendo ya inclusu dirán abriéndose dellos claros o abancios pela tarde sobre too nel ocidente Astur. Les temperatures másimes seguirán en descensu y l’aire nordés sedrá feble en xeneral.
El miércoles tendremos el meyor día de la selmana col cielu poco nuboso o escampláu, amás les temperatures van caltenese fresques sin subir muncho al mediudía con aire sele ya variable.
El xueves seguiremos esfrutando del sol pero al mediudía calecerá en forma con unes temperatures másimes que van averase a los 23-24ºC por mor del vientu ábrigu que pue soplar molestu na cordelera. De tarde aumentará la nubosidá media-alta pero sin precipitaciones y entovía con dellos claros nel cielu.
Paez que de cara al vienres la llegada d’una vaguada pue traenos precipitaciones, un descensu bulatable de les temperatures y nieve nes cumes más altes de la cordelera, perriba de los 1800m, pero esto yá lu diremos viendo.
Que paséis un bon llunes collacies ya collacios.
This work is licensed under a Creative Commons Attribution 4.0 International License.
