La intervención d’Iniciativa pol Asturianu afaló al Conceyu Gozón a camudar les bases pa permitir la participación de testos na llingüa propia

El premiu de poesía y rellatos curtios Aurelio González Ovies va permitir la presentación d’obres n’asturianu, gracies al pidimientu fechu por Iniciativa pol Asturianu depués de que’l Conceyu de Gozón presentare, va unes selmanes, la convocatoria del primer premiu lliteriariu que lleva’l nome del autor bañugueruy, coles bases únicamente contemplando namás la presentación de testos escritos en castellán.

“Iniciativa pol Asturianu cuenta con una xera continuada pa tratar que tolos premios que se convoquen n’Asturies permitan al menos presentar obres n’asturianu. Idealmente con categoría propia diferenciada, pero sinón al menos eso, que permitan participar” declaren dende Iniciativa.

Nesti casu, al revisar les bases de la nueva convocatoria lliteraria, la organización comprobó que nun contaba con una categoría específica na llingua propia pero tampoco aporta la posibilidá de presentar llibremente creaciones n’asturianu. Ante esta tesitura, la organización de reivindicación llingüística contactó cola conceyalía de Cultura de Gozón pa reclamar l’ampliación de la convocatoria y permitir el concursu de testos n’asturianu.

L’asociación alegó qu’esto permitiría una mayor participación de los autores asturianos ensin tener qu’arrenunciar a escribir nel so idioma maternu, arriqueciendo la creación cultural n’asturianu y visibilizando la propia llingua. Destaca amás que sería lo más coherente teniendo en cuenta la tradición lliteraria del titular del premiu.

El conceyal de Cultura, Israel González, amosó la to total disposición a atender la reclamación plantegada pola asociación de reivindicación llingüística y comprometióse a que na siguiente convocatoria sedrá posible presentar obres n’asturianu. 

Susana Sela

This work is licensed under a Creative Commons Attribution 4.0 International License.