Bonos díes, bona xente.
Alborecemos col cielu cubiertu por nubes baxes que mos tan dexando dalgo d’orpín en delles zones d’Asturies con unes temperatures que tan alrodiu de los 13ºC, rexistrándose nel puirtu Payares 5,4ºC.
Güei pali que pali dirá disminuyendo la nubosidá y desapareciendo les precipitaciones pa dir abriéndose dellos claros o abancios durante la tarde con unes temperatures en descensu ya col aire que sedrá del nordés dalgo molestu pela tarde nel llitoral y zones espuestes.
Mañana miércoles alboreceremos con nublines y borrinos nes zones baxes, tando más escampláu na cordelera ya interior asturianu anque a partir del mediudía yá llucirá’l sol en toa Asturies con unes temperatures mínimes en descensu y con les másimes que camudarán poco o subirán llixeramente. L’aire sedrá sele ya variable con brises nel llitoral.
El xueves seguiremos esfrutando del sol pero por mor del vientu ábrigu subirán abondo les temperatures másimes, averándose a los 23-24ºC, amás nel cielu dirá surdiendo dalguna nube media-alta pa dexanoslu nuble al finar el día, cuando nun se descarta dalguna precipitación feble ya ocasional.
Durante’l riscar del vienres la llegada d’un frente fríu mos dexará precipitaciones de calter moderáu ya un descensu bultable de les temperatures con nieve nes cumes más altes de la cordelera, perriba de los 1800m. Pela mañana van abrise dellos claros ya tendremos el tiempu más seliquino a la espera de los xarabatos que probablemente se den al atapecer cola llegada del aire fríu n’altor. L’aire sedrá del noroeste con raches moderaes en zones altes ya en puntos del llitoral.
El sábadu ya’l domingu sedrán más estables pero seguiremos con nubosidá y dalguna precipitación feble ya ocasional con tendencia a subir dalgo les temperatures de car al domingu, pero esto yá lu diremos viendo.
Que paséis un bon martes collacies ya collacios.
This work is licensed under a Creative Commons Attribution 4.0 International License.
