Bonos díes, bona xente.
Alborecemos col cielu escampláu ya con unes temperatures que tan alrodiu de los 11ºC anque onde ta soplan l’aire ábrigu ya se tan disparando como per exemplu nel cabu Peñes que tienen 18,4ºC. Nel puirtu Payares rexistren 9ºC.
Güei tendremos el cielu poco nuboso pela mañana con aumentu la nubosidá de tarde cuando entamará a entrar per Galicia un frente fríu. A últimes hores mos dexará dalguna precipitación feble, empezando per ocidente asturianu. L’aire ábrigu va soplar molestu na cordelera y al pasu per ella fadrá l’efeutu foehn sobre’l restu d’Asturies, faciendo que medren abondo les temperatures másimes que puen algamar los 23-24ºC
Durante’l riscar del vienres afeutarámos lo gordo del frente con precipitaciones abondoses de calter moderáu, amás les temperatures descenderán bultablemente y la nieve pue surdir nes cumes más altes de la cordelera.
Durante la mañana abriranse grandes claros anque l’ambiente sedrá fríu y al atapecer dirán surdiendo nubes de desendolque por mor del aire fríu n’altor que puen dexar xarabatos febles ya ocasionales de nieve perriba de los 1600m. L’aire sedrá gallegu pela mañana y de componente noroeste de tarde con raches moderaes en puntos del llitoral y cordelera.
Como novedá, a última hora del vienres, esi aire fríu n’altor va facer que se forme una pequena borrasca al norte de Galicia empobinándonos vientu de componente suroeste, faciendo que les precipitaciones caigan sobre ella y quedando la mayor parte d’Asturies al abellugu d’elles, polo qu’esfrutaremos d’una ventana de bon tiempu durante’l sábadu y nun sedrá hasta l’atapecer cuando regresen les precipitaciones xeneralizaes a Asturies. Les temperatures seguirán en descensu y l’aire sedrá sele ya variable.
El domingu lo más probable ye que tengamos un día pasau per agua pero esto va depender del movimientu que faiga dicha borrasca qu’entá nun ta na claro.
Que paséis un bon xueves collacies ya collacios.
Semeya d’una sacavera que mos l’apurre’l nuesu collaciu Pachu Armesto Hevia.
This work is licensed under a Creative Commons Attribution 4.0 International License.
