Bonos díes, bona xente.
Alborecemos col cielu poco nuboso en xeneral, sicasí na fastera ocidental les nubes son más abondoses con unes temperatures que tan alrodiu de los 6ºC, rexistrándose nel puirtu Payares 0,6ºC. Ayeri, como novedá, mos comentaba Tania dende’l abellugo del Meicin que nevaba seliquinamente perriba de los 1600m.
Esta mañana tendremos una ventana de bon tiempu na mayor parte d’Asturies con grandes claros nel cielu quedando al marxen la fastera más ocidental, onde tará más nuboso cola posibilidá de dalguna precipitación feble. De tarde aumentará la nubosidá en toa Asturies pudiendo estendese les precipitaciones a más zones. L’ambiente seguirá siendo fríu con unes temperatures en descensu y l’aire sele en xeneral con dalguna racha molesta nel llitoral ocidental.
Mañana domingu’l movimientu de la dana al centru penínsular va facer que mos afeute un frente retrogrado, entrando pel oriente asturianu onde mos dexará precipitaciones abondoses de calter moderáu , según vaya avanzando hacia l’oeste dirá perdiendo fuelle y les precipitaciones sedrán menos abondoses ya frecuentes. Les temperatures mínimes ascenderán por mor del cielu cubiertu, mentantu les másimes esperimentarán un descensu. La nieve surdirá nes cumes más altes de la cordelera perriba de los 2000m. L’aire sedrá del nordés con dalguna racha fuerte en zones altes ya en puntos del llitoral.
El llunes alboreceremos ente la nublina y el borrín que dirán dixebrándose a lu llargu la mañana pa dexanos el cielu poco nuboso o escampláu con unes temperatures n’ascensu dempués d’una alborada fría.
Paez que la selmana viniente sedrá estable con dalgunes nubes de retención por mor del vientu nordés que pue soplar molestu pela costa, tando más escampláu nel interior con temperatures propies de l’época na que mos atopamos, pero esto yá lu diremos viendo.
Que paséis un bon fin de selamana collacies ya collacios.
This work is licensed under a Creative Commons Attribution 4.0 International License.
