InfoAsturies participa d’esta iniciativa que fae por dar puxu y visibilidá a les empreses y profesionales qu’utilicen l’asturianu comu llingua vehicular nel desendolcu del so trabayu
Esti llunes 28 d’ochobre celebróse nel Centru d’Empreses de La Curtidora d’Avilés, la I Xunta Xeneral de la organización Empreses y Profesionales pol Asturianu (EPA). Na Xunta ratificáronse los estatutos de la entidá y fíxose informe de les actividaes entamaes pola Xunta Directiva Provisional.
Esti aconceyemientu valió tamién pa escoyer imaxe corporativa y llogotipu de la EPA, ente les propuestes presentaes polos asociaos, asina como pa votar la elección de la primer xunta directiva de la mesma, encabezada por Xicu Mata como presidente y Susana Rubio como vicepresidenta y vocalía de comerciu.
Alejandra Isabel García foi escoyida secretaria y vocal de Xuridico-llegal, y Félix Fernández como ayalgueru. Como vocales, fueron escoyíos Inaciu Iglesias, de Rellaciones Institucionales, Inaciu Galán, de Comunicación, Sergio Buelga, de Dinamización Cultural, Olaya Fuente, d’Eventos, Llucia Fernández de Cultura Sidrera, Xurde Llano, d’esporte, y Susana Sela, Formación y Tornes llingüístiques.
L’asociación Empreses y Profesionales pol Asturianu (EPA) lleva alredor de dos años trabayando de forma provisional y construyendo’l camín pa constituyise de manera formal, recuperando la organización coles meses sigles que se constituyera nel añu 1997.
Empreses y Profesionales pol Asturianu (EPA) tien l’oxetivu común de trabayar na visibilización de les llingües propies d’Asturies na actividá d’empreses, profesionales y mutualistes que faen usu d’elles nel so día a día de formes estremaes, faciendo d’ello la normalización necesaria p’algamar unes condiciones d’igualdá pa con otres llingües del Estáu, teniendo bien claro la necesidá de que la oficialidá seya reconocida.
La organización quier amosar qu’esti ye un activu fundamental pa la sociedá asturiana y un ferramienta ventayosa pal desenvolvimientu económicu. De la mesma, busquen crear sinerxes ente estes empreses y profesionales, facilitando la visibilización social de les empreses y profesionales qu’apuesten pola llingua llariega.
La EPA quier afalar la creación de materiales que faciliten l’usu internu nes empreses de
los idiomes autóctonos asturianos, buscando l’adaptación de programes informáticos, modelos de formularios, etc. Amás l’oxetivu ye l’establecimientu de procesos activos d’interllocución cola alministración y la collaboración con otres entidaes en defensa del asturianu. Ente los proyectos ta la programación de charres, meses redondes y seminarios, la organización de feries, certámenes y premios asina comu l’asesoramientu llegal en materia llingüística.
Llucía F. Marqués
This work is licensed under a Creative Commons Attribution 4.0 International License.
