L’Academia de la Llingua Asturiana cellebra les XLII Xornaes Internacionales d’Estudiu, los díes 5, 6 y 7 de payares nel Salón d’Actos de la primer planta del Edificiu Alministrativu de la Facultá de Filosofía y Lletres de la Universidá d’Uviéu
L’entamu institucional tendrá llugar el martes cincu de payares, a les 12:30, cola presentación por parte de l’académica Ana Cano del nuevu Lletres Asturianes, que fai el númberu 131. Carlos Lastra presentará el númberu 14 de Cartafueyos Asturianos de Ciencia
y Teunoloxía. A la una Elena E. Rodríguez (Universidad de Huelva) ufrirá la primer conferencia d’estes xornaes, entitulada«El códice del Fueru Xulgu de la Biblioteca Estatal de Baviera: cuestiones de datación y localización».
Tres de la posa pa la xinta l’actividá retomaráse cola I Mesa de comunicaciones, na que Elena Álvarez presentará “Témporas d’eiquí, un poemariu de Fernán Coronas”, Adrián Martínez falará de “Lo qu’escuende l’estoyu: xenealoxía histórica del fondu documental de Fernán-Coronas” y Diego García tratará’l tema “El Rexonalista Astur: breve aproximación historiográfica”.
La II Mesa de comunicaciones, qu´entamará a les cincu, tendrá a Noelia S. García comu primer protagonista, falando del Teatru en femenín, “Una relectura del teatru costumista asturianu con perspectiva de xéneru”. Darréu intervendrá Pablo R. Medina, qu’entitula la so intervención comu “Burla burlando: l’asturianu como elementu caracterizador na obra de Manuel Álvarez Marrón”.
A les seis de la tarde tendrá la presentación de “Un homenaxe a la llingua de los mios güelos a traviés de la creación d’una llotería Asturiana”, a cargu de Jacinta Bujanda Suárez y media hora más tarde Reina Bastardas (Universitat de Barcelona) y Julen Manterola (Euskal Herriko Unibertsitatea) fadrán una “Revisión crítica de las etimologías vascas del Diccionariu Etimolóxicu de la Llingua Asturiana (DELLA)”, cola que se presllará la primer xornada.
El miércoles seis l’actividá entamará de tardi, cola III Mesa de comunicaciones, dedicada nesti casu a la “Llexicalización, gramaticalización y pragmatización na fraseoloxía asturiana”, que presentará Llucía Menéndez, con Victor Bargiela a continuación falando de les “Primeres aproximaciones sociofonétiques a la prosodia del asturianu de Xixón”.
La IV Mesa de comunicaciones tratará L’apaición de Conceyu Bable nel so tiempu y espaciu (Marcos Rodríguez) y farás una comparanza del asturianu con otres llingües del estáu na intervención de Francisco José Llera “Les llingües d’Asturies y les otres llingües rexonales españoles: dalgunos datos comparativos”.
Inaciu Galán presentará darréu l’Archivu de la Represión Llingüística del asturianu y Pilar Fidalgo Pravia y Carmen Muñiz Cachón presentarán “La traducción d’Exercicios d’estilu de Raymond Queneau”. La Conferencia del académicu José Antonio Fernández Vior “Normas ortográficas del eonaviego: valor social y norma llingüística” presllará les actividaes d’esta segunda xornada.
El xueves sedrá el caberu día y entamará a les cuatro la tardi cola V Mesa de comunicaciones, qu’entamará col tema “La lliteratura infantil y xuvenil n’asturianu nos caberos 25 años: formatos, temátiques y camín de futuru” (Loreto Díaz y Aída Bárbara Parrales), siguiendo con “Ente Morgana y Melusina: el mundu feéricu en trés relatos populares asturianos” (Andrés Fernández) y “La violencia de xéneru nes noveles de Gonzalo G. Barreñada” (Darío de Dios)
La sesta y cabera Mesa de comunicaciones entama cola reflexón de Nel de la Campa “D’oricios a «mejillones»: pequeñu estudiu sobre’l vocabulariu del mariscu na fala de Xixón d’anguaño” , al que siguirá Xuan Lajo con “Igua del Diccionariu Senabrés” y Xuan Pedrayes con “La toponimia de la mar d’Asturies”.
La conferencia que presllará les Xornaes d’Estudiu tará a cargu d’Hugo Carbonnelle (Sorbonne Université) y tien l’entítulu “De la evolución y del mantenimientu del sufixu protorromanu */-’jon-e/ n’asturianu: enfoque morfolóxicu y diacrónicu”. Darréu quedará namás la Clausura institucional pa dispedir estes xornaes fasta l’añu viniente.
La entrada a les conferencies ye llibre. Sicasí, les persones matriculaes a les Xornaes van recibir un certificáu acreitativu.
Susana Sela
This work is licensed under a Creative Commons Attribution 4.0 International License.
