El preciu mediu d’una vivienda en Asturies algama los 833 euros, superando’l costu d’una hipoteca media. Coles mesmes la vivienda vacío xorrez cuasi un cuarenta per cientu

La escasez d’ufierta alza los precios dica  los 9,8 euros el metro cuadráu en Xixón o los 9,4 n’Uviéu, coles mesmes qu’un mínimu de 100.000 cases tán oficialmente en desusu, yá seya por especulación, desdexamientu o llerza a los impagos d’arriendos. A elles hai que sumar otres 27.516 que namás s’utilicen un mes o menos al añu y les 152.000 que s’ocupen bien esporadicamente, ello ye, un total de 280.000 viviendes que nun s’utilicen como residencia avezada, alredor del 40% de les disponibles en toa Asturies.

Tou ello nun escenariu d’aumentu de la demanda, na que los foriatos que vienen a teletrabayar y la medría de pisos turísticos y segundes vivendas non solo alza los precios, sinón que dexa a los asturianos, -con una renta menor-  ensin opciones d’atopar residencia nos sos propios pueblos y ciudaes.

El récord llévalu Xixón, onde acordies los caberos datos el preciu mediu d’arriendu raspia los 10 euros el metru cuadráu, con un xorrecimientu del 14,3% con respectu al añu pasáu -con 8.300 viviendes vacies-. N’Uviéu tamién se repara una llamativa xubía del preciu de los arriendos, del 10% esti añu, asitiando’l costu del metro cuadráu na capital en  9,4 euros, siguíu de Llanes con 8,6 euros y Avilés con 7,9.

Con estos datos na man, la Universidá d’Uviéu entiende que siquier 13 de los 78 conceyos asturianos cumpliríen los requisitos pa que dalgunes de les sos llocalidaes puedan ser consideraes “zones tensionaes pol eleváu preciu de la vivienda”, distintivu qu’enagora solicitóse namás que pa los barrios de Cimavilla y L’Arena, en Xixón.