Cuando tan a piques de cumplise los venti años de l’aprobación por unanimidá de la Lei Orgánica 1/24 28 d’Avientu de Midíes de Protección Integral Contra la Violencia de Xéneru, ayeri recordábense les 76 muyeres y menores asesinaes nel estáu no que llevamos d’añu

La concentración que ca caberu miércoles de mes refuga les violencies machistes en Xixón, a la qu’allegaron más d’un centenar de persones, remató cola intervención de la representante de los Verdes-Equo, quien recordó qu’esta llei recueye que “La violencia de xéneru nun ye un problema qu’afecte al ámbitu priváu. Al contrariu, manifiéstase como’l símbolu más brutal de la desigualdá esistente na nuesa sociedá. Trátase d’una violencia que se dirixe sobre les muyeres pol fechu mesmu de selo, por ser consideraes, polos sos agresores, carentes de los drechos mínimos de llibertá, respetu y capacidá de decisión”, resumiendo con aciertu’l problema. Esa llei, que supunxo nel so momentu una enorme meyora social y políticu, quiciabes nun fuera aprobada güei, cavilgó na so intervención, reclamando amás una afayadiza educación afeutivo sesual pa camudar el futuru, el control de el maltratadores -y non de les sos víctimes- o que se trate la violencia machista como terrorismu, ente otres posibles midíes p’atenuar esta llacra. 

En lleendo de mancomún el nome de les 76 muyeres asesinaes, d’ente 16 díes y 90 años, hubo una alcordanza pa les families de les families de les víctimes “families estrozaes, doblemente cutíes pol crime machista y pol vacíu que dexa esti asesinatu”.

Tamién hubo un momentu pa recordar otru tipu de violencia machista que non siempres mata, pero estroza vides, refiriéndose al casu de les menores violaes y prostituyíes por empresarios que, diez años dempués, tienen entá que sufrir qu’un sistema xudicial patriarcal dafechu dexe en llibertá a los sos abusadores, demostrando nuevamente la vieya máxima de que, si hai perres, nun hai xusticia.

La próxima cita contra les violencies machistes va ser el miércoles 28 de payares delantre la Gota Llechi, en Xixón, a les siete la tardi. 

Nel Dos Santos

This work is licensed under a Creative Commons Attribution 4.0 International License.