Bonos díes, bona xente.
Alborecemos col cielu poco nuboso o escampláu ya con unes temperatures que tan alrodiu los 12ºC, rexistrándose nel puirtu Payares 8,7ºC.
Güei tendremos un día soleyeru con escasa nubosidá y temperatures altes algamándose los 20ºC de magar del mediudía, amás l’aire sedrá sele en xeneral con dalguna brisa pela costa.
Mañana xueves sedrá’l día más calurosu de la selmana ya tendremos el cielu poco nuboso pero con aumentu de la nubosidá alta pela tarde.
El vienres un frente atlánticu arrimarase a Asturies cola posibilidá de que dexe dalguna precipitación pela tarde, sobre too na fastara ocidental y cordelera, amás les temperatures entamen a baxar.
El sábadu alboreceremos con nubes baxes, borrinos y nublines que van dir dixebrándose durante la mañana pa dexanos de nuevu una tarde soleyera y prestosa, anque les temperatures van dir normalizándose, descendiendo llixeramente esti día.
El domingu tendremos nubes ya claros o abancios con unes temperatures que siguen en descensu llixeru.
Más a llargu plazu paez que pue lleganos dalguna masa fría dende Europa que fadrá descender les temperatures abondu, dexanos dalguna precipitación y dalgo de nieve nes montañes pero esto yá lo diremos viendo.
Que paséis un bon miércoles collacies ya collacios.
Semeya que mos l’apurre la nuesa collacia Consuelo Vazquez dende’l Gumial.
This work is licensed under a Creative Commons Attribution 4.0 International License.
