Avilés acueye’l sábadu nueve a les 12 del mediudíi la enésima concentración contra l’esterminiu del Pueblu Palestín
Dende l’entamu’l conflictu palestín y más entá dende la ofensiva entamada per Israel nos caberos 13 meses, el Pueblu Asturianu bien dexando nidio n’incontables ocasiones el so sofitu al Palestín, y va siguir faciéndolo tol tiempu que faiga falta mientres nun apare’l xabaz xenocidiu sobro Palestina.
Los convocantes, Asturies con Palestina, denuncien la incapacidá -o falta de voluntá- del sistema internacional pa detener el xenocidiu d’Israel en Gaza y la complicidá d’Estaos Xuníos y Europa apurriendo les armes utilizaes pa masacrar a civiles palestinos y baltar los sos llares.
Acusen a instituciones como la Xunión Europea (XE), la Corte Penal Internacional (CPI) y la Corte Internacional de Xusticia (CIJ), xuntu con dellos órganos de la Organización de les Naciones Xuníes ,d’esviase de los sos principios fundacionales de protexer a los civiles y defender la xusticia, desdexando mientres más de 13 meses el so deber fundamental de salvaguardar la vida civil y permitiendo les masacres masives d’Israel na Franxa de Gaza, especialmente na rexón septentrional, despreciando les vides y la dignidá palestines y alimentando la continuación del xenocidiu.
Esti fracasu, denuncien, “revela un defectu estructural nel marcu de seguridá mundial destináu a prevenir crímenes atroces y defender el drechu internacional. Como lo demuestren los crímenes israelinos en cursu nel territoriu palestín ocupáu, sobremanera en Gaza, esti sistema bazcuyó frente a los cálculos políticos y a la influencia de les naciones poderoses cómplices del xenocidiu, fomentando una cultura d’impunidá”.
Destaquen amás que, n’un flagrante desafíu a los Convenios de Xinebra, qu’ordenen la protección del personal mélicu y la respuesta d’emerxencia, les fuerces israelines bloquiaron ambulancies, equipos de rescate, alimentos y material humanitario, atacando hospitales y negando servicios críticos a decenes de miles de persones, ensin intervención d’entidaes como’l Comité Internacional de la Cruz Roja, qu’abdicó del so papel nesti ataque.
El númberu de periodistes asesinaos poles fuerces de la ocupación israelina na Franxa de Gaza aumentó a 182, y en Llíbanu asesinaron a otros 11 periodistes, a pesar de que teóricamente los periodistes tán protexíos mientres los conflictos armaos en virtú del drechu internacional humanitariu, constituyendo cualquier ataque contra ellos un crime de guerra según el drechu internacional.
Por too ello y por tol horror pal que nun hai pallabres, la prósima cita ye’l sábadu nueve a les 12 n’El Parche, Avilés.
Llucía F. Marqués
This work is licensed under a Creative Commons Attribution 4.0 International License.
