L’asunción de responsabilidaes, la reparación segura, non solo d’esi tramu sinón de tolos puntos peligrosos de l’AP 66, la fin de la -nefasta- xestión privada de la mesma y l’atención, non solo a les condiciones d’esta vía de comunicación sinón de tola rede de carreteres asturianes que vertebren el país son les principales reclamaciones recoyíes nos comunicaos llanzaos esta mañana por ambes organizaciones.

La mañana del domingu 10 de payares conocíase la noticia d’un argayu de considerables dimensiones na autopista del Güerna, a l’altor del PK 76,  dexando cortáu el pasu pente Asturies y la meseta.

Dexando a un lláu los comentarios graciosos qu’anubrieron les redes de magar l’argayu que corta dende ayeri l’Autopista del Güerna, “dexando España aislada” o “declarando la independencia de factu” el fechu ye qu’Asturies queda coles comunicaciones cortaes  cola Meseta pa un tiempu que los optimistes valoren en “cuatro o cincu dies” y los xeólogos en semanes o meses, “si se faen les coses bien”, coles inevitables consecuencies económiques pa tresportistes, empreses y viaxeros. Eso dando por ciertes les afirmaciones oficiales de que nun hai víctimes sepultaes baxo les miles de tonelaes de roca y tierra que taparon los cuatro carriles de la vía, qu’esperamos que se confirmen col pasu los díes.

Andecha Astur y Aina ficieron esta mañana declaraciones reclamando a Aucalsa, empresa concesionaria, responsabilidaes por la falta de caltenimientu d’esta infraestructura, cuya peligrosidá lleven años denunciando dende Andecha Astur, que tamién protagonizó delles campañes desixendo la fin de la concesión pa la xestión privada d’esta autopista.  

Aucalsa lleva dende l’añu 1983 beneficiándose económicamente d’esta vía de comunicación, una de les víes onde’l coste de peaxe por kilómetru ye más altu del estáu, quedando escluyía de la lliberación de peaxes del 2018 y viendo espoxigar el so preciu añu a añu. Seique anicialmente’l so concesión finaba nel añu 2021, lo que permitiría l’anulación del peaxe nun plazu de menos de 3 años, l’ampliación de la mesma al 2050 siendo Francisco Álvarez-Cascos ministru de Fomentu allargó fasta los 75 años la duración del peaxe. Socesivos gobiernos españoles y asturianos prometieron tomar midíes nos sos programes elleutorales, dende que Zapatero prometiere lliberar de peaxe nel 2004, “lliberación qu’elleición tres elleición el PSOE ufierta dientru’l so programa y qu’a la hora de la verdá escaez dafechu, dándose’l casu de que l’actual gobiernu de Barbón pretende que mos conformemos con una cenciella rebaxa”.

Esta infracadarma, que supunxo un altísimu impautu ambientaly  social nos valles del centru-sur d’Asturies, presenta bien de deficiencies dende la so construcción, apuntaes por xeólogos dende’l primer momentu, siendo  una de les víes d’alta peligrosidá del estáu, ensin que los gobiernos nin la empresa concesionaria entamen les midíes afayaices pa solucionar esa cuestión.

Poro, Aina y Andecha Astur reclamen a Aucalsa qu’asuma les sos responsabilidaes nesti eventu, que tome les midíes necesaries pa iguar de manera segura y rápida l’argayu y que’l coste económicu de la reparación nun recaiga nuevamente nel erariu públicu.

Aprofiten la ocasión pa recordar que si ye cierto qu’urxe acometer, con seguridá y garantíes, la reparación d’una autopista que supón la principal vía de comunicación d’Asturies con España, nun pue escaecese que ye la redede carreteres secundaries la que más argayos, inestabilidaes y desperfechos carez, “siendo precisamente esta la que-y da vida a una Asturies rural que se ve amenazada por un modelu económicu nel que la vida fuera de la exa central atópase, en munches ocasiones, abandonada dende lo público”.

Nel Dos Santos

This work is licensed under a Creative Commons Attribution 4.0 International License.