Bonos díes, bona xente.
Alborecemos col cielu nuboso con unes temperatures que tan alrodiu de los 9ºC, rexistrándose nel puirtu Payares 7,2ºC.
Güei vamos tener nubosidá media-alta que sedrá más abondosa na fastera surocidental onde nun se descarta dalguna precipitación feble en xeneral, nel restu sedrá menos compacta ya inclusu puen abrise dellos claros o abancios nes hores centrales del día. L’aire sedrá sele ya variable con raches moderaes de vientu ábrigu na cordelera que fadrán subir les temperatures másimes.
Mañana sábadu tendremos un tiempu mui asemeyáu, sicasí subirán dalgo más les temperatures con nubes medies y altes nel cielu que sedrán más abondoses nel suroeste Astur.
El domingu seguiremos con esti tiempu de “nin fú nin fá ” con nubosidá media-alta, temperatures suaves y vientu seliquino menos na cordelera onde pue soplar con raches moderaes l’aire ábrigu nes zones espuestes.
Pa más alantre hai la posibilidá, según los modelos meteorolóxicos europeos, del surdimientu d’una cicloxenesís esplosiva que barrería’l Cantábricu, esto sedría hacia’l vienres, antes hacia’l martes-miércoles l’aire de componente noroeste de llargu recorríu mos apurriría precipitaciones abondoses y dalgo de nieve pela cordelera, amás d’un descensu de les temperatures, pero esto yá lu diremos viendo.
Que paséis un bon viernes, collacies ya collacios.
Mapa de previsión del modelu Européu onde vese la cicloxénisis esplosiva sobre’l Cantábricu oriental.
This work is licensed under a Creative Commons Attribution 4.0 International License.
