Queden doce díes pa finar la recaldación popular y entá falten cerca de diez mil euros p’algamar el mínimu fixáu nesti crowfounding
“Esti crowdfunding ponse en marcha porque 4 muyeres solidaries, un home y la trabayadora afectada foron condergaes a prisión por defender los drechos llaborales d’una compañera, utilizando únicamente ferramientes sindicales llegales”. Con eses pallabres entama’l testu qu’acompanga la solicitú de financiación popular pa sostener a estes seis persones al traviés de goteo.org.
Con esta recaldación, entamada pola CNT ya’l Grupu Sofitu a les 6 de La Suiza, intenta conseguise los fondos que faen falta p’afrontar los gastos de les preses na cárcele, pagar les inxustes multes impuestes pol Tribunal Supremu, cubrir los gastos xudiciales y tamién les necesidaes de los sos fios nel esterior, caltener les sos viviendes y otros gastos básicos que yos permitan seguir coles sos vides cuando se yos devuelva la llibertá.
Con aportaciones que van dende ún a mil euros, pali que pali, la cifra de donaciones va averándose a la mínima de 70.000 euros plantegada, seique con 60.638 entá tan bien lloñe de la cantidá marcada comu óptima, 120.000. A doce dies de la fin del crowfunding fae falta un caberu esfuerciu p’algamar, siquiera, los diez mil euros que fadríen llegar al mínimu.
Llucía F. Marqués
This work is licensed under a Creative Commons Attribution 4.0 International License.
