La Universidá d’Uviéu pon en marcha una Unidá de Cultura Científica y de la Innovación (UCC+I) y una Cátedra de Cultura Científica col enfotu d’averar la ciencia a la sociedá, fomentar vocaciones STEM (Ciencia, Tecnoloxía, Inxeniería, Artes y Matemátiques) y combatir la desinformación.
La Cátedra de Cultura Científica, dirixida pola Universidá d’Uviéu y sofitada pola Fundación pal Fomentu n’Asturies de la Investigación Científica Aplicada y la Tecnoloxía (Ficyt), va centrar los sos esfuerzos n’estudios sobro la percepción social de la ciencia, la promoción de la ciencia ciudadana y l’analís del impactu de la tecnoloxía na sociedá. Esta cátedra va sirvir como ponte ente l’academia y la ciudadanía, coles mires de fomentar vocaciones científiques y aumentar l’interés pola investigación dende edaes tempranes.
La Unidá de Cultura Científica y de la Innovación, xestionada pol Ficyt, va ser l’epicentru d’actividaes qu’impulsen la comunicación científica, l’espardimientu de resultaos d’investigación y la formación n’innovación. La so acreditación, prevista pa 2025, va depender de la Fundación Española pa la Ciencia y la Tecnoloxía (Fecyt), una entidá clave na promoción científica a nivel nacional.
Cola puesta en marcha de la UCC+I y la cátedra d’espardimientu, Asturies asítiase como un referente na promoción de la cultura científica y l’innovación. Estes ferramientes non solo van facilitar l’accesu de la ciudadanía a la conocencia, sinón que tamién van impulsar la participación activa na ciencia y van fortalecer el texíu educativo y tecnolóxico del país.
Alberto Rodríguez
This work is licensed under a Creative Commons Attribution 4.0 International License.
