Bonos díes, bona xente.
Alborecemos col cielu cubiertu ya con unes temperatures que tan alrodiu de los 12ºC, rexistrándose nel puirtu Payares 6,5ºC.
Güei van dir dixebrándose les nubes baxes del alborecer pa dexándonos con nubes ya claros o abancios durante la mañana.
Pela tarde aumentará l’aire gallegu que sedrá moderáu nel llitoral y zones altes y amás mos apurrirá de nuevu nubosidá pa dexanos el cielu nuble con unes temperatures en descensu llixeru.
Durante’l prósimu riscar y l’alborecer de mañana miércoles vamos tener xarabatos, sobre too na fastera centru-oriental febles en xeneral pero que puen tener calter moderáu llocalmente con unes temperatures en descensu ya col aire gallegu que dirá perdiendo puxu. El restu’l día sedrán menos probables, dispersos ya ocasionales.
El xueves medrarán dalgo les temperatures al mediudía pero pela tarde la llegada d’una borrasca de pasu rápidu que barrerá’l Cantábricu mos dexará a últimes hores precipitaciones moderaes que vendrán acompangaes de vientos racheaos y fuertes y un descensu de les temperatures, surdiendo la nieve col camudo’l día perriba de los 1500m.
Los xarabatos de la nueche del xueves van a estendese durante’l riscar del vienres con una cota de nieve que baxará a los 1300m.
Al alborecer y pel día va tar más seliquino con nubes ya claros o abancios nel cielu pero con una mañana fría, templando de tarde pela cordelera cola llegada de vientu ábrigu.
El sábadu una borrasca sobre l’atlánticu va dir empobinándonos vientu ábrigu que fadrá subir bultablmente les temperatures y a partir de la tarde y sobre too durante’l riscar y mañana del domingu pue dexanos raches mui fuertes en zones altes y espuestes, nel cielu tendremos nubes medies y altes pero sin precipitaciones, sicasí na fastera más surocidental d’Asturies pue dexanos dalguna precipitación feble por retención.
Que paséis un bon martes collacies ya collacios.
Semeya que mos l’apurre la nuesa collacia Mary Pandiella.
This work is licensed under a Creative Commons Attribution 4.0 International License.
