Asturies Insumisa da la voz d’alama sobre l’espoxigue d’incidentes graves na estación d’autobuses d’Avilés que ponen n’entedichu la seguridá pa les usuaries del serviciu
D’un tiempu p’acá detéctase la presencia d’individuos que frecuenten la estación d’autobuses intimidando a muyeres d’avanzada edá y moces xóvenes, hasta consiguir que-yos entreguen una cantidá de dineru, ocurriendo estos fechos incluso nos baños de la estación.
Asturies Insumisa remembra que la falta seguridá nesta estación d’autobuses d’Avilés nun ye nada nuevo y nun ye la primer vez qu’esta cuestión ye portada nos medios de comunicación asturianos.
La responsabilidá de la seguridá nesta estación recai direutamente na empresa encargada de la xestión de la mesma, nomada Estación d’Autobuses d’Avilés y propiedá de la empresa ALSA, como vien recoyío nel Pliegu Condiciones de la concesión, pero niégase a contratar personal de seguridá.
Pel otru lláu el Conceyu d’Avilés, propietariu de la estación y responsable de la seguridá de los ciudadanos y ciudadanes d’Avilés nes sos instalaciones, fai dexación de les sos funciones y permite a la empresa ALSA actuar al so caprichu.
Dambes entidaes esquiven responsabilidaes aludiendo a la esistencia d’un Sistema Activu de Seguridá, consistente esclusivamente na colocación de delles cámares de seguridá, un sistema que permite grabar, pero non evitar los fechos que tán denunciándose.
“Ye posible que’l viniente llunes, 25 payares, dalgunes y dalgunos representantes del Gobiernu municipal avilesín, formáu pol PSOE y Cambia Avilés, una coalición d’Izquierda Unida y Podemos, tean presentes na manifestación del Día Internacional escontra la Violencia hacia les Muyeres. Mentantu, munches usuaries de la estación d’autobuses d’Avilés van siguir abandonaes a la so suerte y ensin nengún tipu de proteición per parte de la empresa ALSA y del Gobiernu municipal avilesín” declaren dende AI.
Llucía F. Marqués
This work is licensed under a Creative Commons Attribution 4.0 International License.
